DOWNLOAD OUR APP

Read latest news on your phone
app-store

I ram leh hnam humhalh nan i ram zim te kha humhim rawh

Aug 14, 2022

Kan kâ kan àn vanga thil tha chhuak leh, thil tha ló chhuak hian, ram leh hnam tân pawi a khawih thui zia ngaihtuah pahin, thuthlukna siam ila. Duh thusam eng emaw vel vanga, kan ram leilung hnam dang tàwna kan tih riral mai chuan... tu nge he ramah hian thlamuang takin, lu nghatin piaral pan ang?

Thu hmaruai neih ka tum lem lo, a hnung lamah thu hma chu kan dah mai dawn nia... Le hei kan ram kan hria a, chîm ral kan hlau hle mai! Chutih rual erawh chuan hausak kan duh luatah, ram leh hnam ngaihtuah lêk lo-in kan khawsa leh mai thin, hnam dang kan ramah an kat nuk a, kan hmu a, kan hre bawk a, a hria leh hria kan inhrilh chhawng a, amaherawh chu kan sawi kan sawi a, a zo der thin hi a ni.

Hmeichhia kan ni a, indopui, ram buai pawh thleng se, tih theih nei tlem ber kan ni ti ila kan sawi sual awm lo e, amaherawh chu; kan ram zîmtê erawh hnam dang lakah kan humhalh thei tih i hria ang u, he kan ram ka tih hi, hnam dangte nena inthlahpawlh lo a, Mizo Tlangval ngei tana kan ram kan venhim theih ve chhun hi, zuah a, humhalh turin ka ngen duh che u a ni.

Silai nen engang pawhin tan khawh dawn ila, zo thathum lo tur kan tam dawn si a, a kahpuah ruala let tawp tur lah kan tam dawn nen, heti zâwng hian kan ram leh hnam hi i humhalh hlauh ang u. Ni e vâi kan tihte lakah dawr leh in leh lo kan ti ral nasa, tu mawh nge tih hi i ngaihtuah ngai em?

Ka ngaihtuah thin hmeichhia hi kan pawimawh nasa si... hnam dang hnena hralh turin pa-in nu rawn lovin a thu a keuh thlu dawn lo, fapa-in a chan pual a tih ral dawnin, nu thu hmu lo a, a tih ral ka ring lo bawk!

Hmeichhia zel hi ràwn leh hrilh kan ni a, chutah chuan phalsak an nih lohna hmunah pa ber emaw fa emaw pawh ni se, inhnial ni khua-a kan hmatheh ber leh kan tan em em hmeichhiate thu chu zawm a ni leh thin.

Kan kâ kan àn vanga thil tha chhuak leh, thil tha ló chhuak hian, ram leh hnam tân pawi a khawih thui zia ngaihtuah pahin, thuthlukna siam ila.

Duh thusam eng emaw vel vanga, kan ram leilung hnam dang tàwna kan tih riral mai chuan... tu nge he ramah hian thlamuang takin, lu nghatin piaral pan ang?

Ngaihtuah chiang ila, ram dangah sum hmuh tumin kan kal chhuak chur chur a, kan haw leh hian ram leh hnam kan vei haw em?

Hnam dang ram dang tih dan ngaisâng tawk leka changkangin kan let em?. Kan ramah chuan ti hian kan ti thin tiin hnam dang bulah ka tawngka kan chheh ngam dawn em?

Inenfiah ila, hmeichhia kan ni a, tih theih lo kan nei bik lo ka ram leh hnam tan, he ka ram ka hnam chî tam tak thlah a, an punna tur hmun ram zîmtê hi engah nge kan Mizo Tlangval tan kan hlan loh ang ni... tih rilru pu chungin i inngaihtuah nawn fo ang u.

Tin, Kut hnathawh hi uar ila, kut hna thawk a, hlawk zawka kan thawhrah kan sengna tur atan erawh, thiamna a ngaih thu kan fate leh kan tute hnenah hrilh ila, an zirna nuam ti taka hlawhtlin tuma an beih theih nan intodelh kan ngaihzia hi zirna in leh kan biakbukah ngei pawh hian i sawi fo teh ang u.

Share now