ZALEN January 24, 2025 : Indian Air Force (IAF) kuta Lengpui Airport hmunhma engemawzat Mizoram sawrkarin hlan a tum tha tih loh avanga pawl din, Lengpui Airport Forum chuan airport chu Zoram mipui tana tha lo turah ngaiin hlan lo turin an ngen. AAI ten Mizoram sawrkar lakah harsatna an siam bik an hriatthiam loh thu an sawi bawk.

Aizawl Press Club-a chanchinthar thehdahtute an kawmnaah Airport Forum Convener Lalthuamliana chuan, "Lengpui Airport la tura Mizoram sawrkarin Airports Authority of India (AAI), Indian Air Force (IAF) bakah Private player a dawr hnuah AAI leh Adani group ten an hnawl avangin IAF-a hlan chu Working Committee ten tha an tih ber avanga Cabinet pawhin a pawmpui tawh a ni," a ti.

"Lengpui Airport hi IAF kuta hlan pawh ni se, thu delhkilh an neih atanga thlirin Mizoram sawrkarin tih tur tam tak a la neih dawn tho avangin tuna an chhuanlam ber sum hloh chu a kian phah a rinawm loh, IAF kuta Lengpui airport hlan hian harsatna a sutkian dawn lo mai ni lovin a him lo," a ti bawk.

Lalthuamliana chuan, "Engvangin nge state dang ang bawka Lengpui airport hi Airport Authority of India kutah kan hlan mai loh bik ang. India rama airport tam zawh hi loss making airports a ni. Heng state airports te hi keini aia kum tin hloh tam zawk an ni. State sawrkarin airport enkawlna atan sum sen a ngaih ve loh avangin an chhawr tangkai hle a ni," a ti. Hetihlaia AAI-in Lengpui Airport bika harsatna an siam bik chu an hriatthiam loh thu a sawi bawk.

Lengpui Airport Forum chuan October 16, 2024-a Council of Minister meeting-in IAF kuta Lengpui Airport hlan chungchang an ngaihtuah tuma an thutlukna mipui hriattura thuchhuah siam a ni lo chu mak an tih thu an sawi a, thuchhuah awm se, mipui lam ngaihdan pawh hriat theihna tura an ngai tih an sawi.

2011 khan IAF te chuan Lengpui Airport chu fighter thuhruk nan an dil tawh niin an sawi a, central lam pawhin IAF inkulh nan Lengpui Airport hi an awt viau nia an ngaih thu an sawi. Hemi avang hian Central lam atang pawhin Mizoram sawrkarah hian pressure na tak awm theia an hriat thu an sawi bawk.

Lengpui Airport Forum chuan Airport mipui tana tangkai taka hman chu an dah pawimawh ber thu an sawi a, Central lamin IAF kuta hlan turin nawr mah se, an pawm tur a ni lo an ti. NGO leh political party te pawh mipui ten tha taka an hman theih tur Airport neih a nih theihna atana hmalaknate thlawp tlat turin an ngen bawk.

Lengpui Airport Forum ten 'Lengpui Airport Indian Air Force hnena hlan tum chungchang' tih bu an buatsaih chu he hunah hian MJA President C. Lalrambuatsaiha chuan a tlangzarh nghal a ni.