Icon star RSa a piangthar! || Lengzem khawvel chhuahsanin Pathian hla chauh sa tawh dawn
Jul 21, 2025

ZALEN July 21, 2025 : Youth Icon superstar J Lalrosanga (RSa) chuan lengzem kalsanin Pathian hla chauh a sa tawh dawn. USA-ah bul a tan der tawh a, US dollar 1,000 hlawha lengzem sa tura an sawmna pawh a hnar fithla thak.


  A zai ngainatuten ‘Fuhchiangtea’ tia an koh hian, USA lamah Pathianah piantharna a chang a tih theih awm e. Tuna a khualzinna ramah pawh love song sa tura zin ni mah se, a kalphung a thlak danglam hlawk a. Lengzem lam chu sa tawh lo turin thutlukna a siam a. Hei vang hian zai tura sawmtute pawhin a thu-tlukna zahsakin, love song concert atangin gospel concert-ah an lehsak vek a. USA atanga a rawn haw hnuah pawh lengzem hla sa tura beisei chi a ni tawh lo dawn lo va, mipui hmaa Pathian hla chauh sa tawh turin thutlukna a siam fel tawh.


  Youth Icon star hian lengzem kalsana Pathian hla chauh sa tawh turin hun rei tak atangin a lo inngaihtuah tawh tih sawiin, “Youth Icon intihsiaka a kal chho mup mup a. Intihsiakna zawh hnuah Pathian zarah zai tura sawmnate dawngin, programme ka nei chho zut a. Amaherawhchu, kumin March thla vel atang khan ka rilruah nasa takin gospel lam a rawn ri tan a ni,” tiin, tuna USA-a cham mek RSa chuan Zalen Thalai Khawvel a hrilh.


  Pathian fakna hla chauh sa turin thutlukna a siam ang tih rin ngaihna reng a hriat loh thu sawiin RS-a chuan, “Ka inhrethiam bik lo. A tirah eng emotion vang a nihte ka ring a. Keimah hi ka inkhawngaih tan emaw ni chu aw te ka ti,” tiin, gospel lam rilru a put tan hnu lawk atangin in lamah tawngtaiin hun a hmang chho tan tih a sawi.

  Lengzem sain hmun hrang hranga zai tura sawmna a dawng awl lo va. Chuti chung pawhin gospel tih thu chuan a rilru a kap a, mawlhtu a nei reng tih sawiin, “Programme neihna tur hmun pana bike-a ka inkhalh laite hian, gospel lam ringawtin ka rilru a rawn mawlh a. Ina ka awmte hian, ka bike ding mai mai laite hi ka thlek leh vung vung ringawt thin a. Malsawmna ka dawng nasa lutukte hi mak ka ti thin. Ka tunhma dinhmunte ka thlir a, tun dinhmun ka thlengte hi mak ka ti em em a. Ka rilruah, ‘Pathian hian eng vanga hetiang dinhmuna min dintir nge le?’ tih zawhnate a ri tlut tlut. A chang phei chuan, zaithiam ber pawh ka ni lo va, malsawmna a nih rual rualin ka la ringhlel fan a. Mawi lo ni lo se, Setana malsawmnate emaw ni le ka ti rum rum thin,” tiin rinhlelhna nen hun tam tak a hman thu a sawi.


  Gospel lama tlu lut ve turin Pathianin a kohna a ni tih lam hawia a rilruin hmun tam zawk a luah hnuah, April atangin Pathian hla chauh sa tawh tura thutlukna a siam chu puang hluai turin a rilru siam mah se, zai tura sawmna a lo ‘yes’ tawhnate tihlawhtling leh phawt ang a ti leh ta zawk tih sawiin Youth Icon star chuan, “Programme laksa a lo tam em em a. Programme laksa hi chu ti leh phawt mai teh ang ka tih laiin, kum tawp kan thleng leh hnai chu a ni mai a. Ka tum dan chuan, US-a ka zin zawh hi chuan programme laksa awm tawh lo nen, hun pumin gospel-a lut tawh turin thutlukna ka siam a ni,” a ti.


  US-ah hian lengzem concert-te nei tura sawm a ni. Mahse, US a thlen hnuah pawh gospel lam bawkin a rilruah hmun lian tak a luah tih sawiin, “US ka thlen hnuah gospel chuan ka rilru a rawn luah leh reng a. Amaherawh chu, US-a ka programme zawng zawng hi lengzem concert vek a ni a. Ka rilru pawh a insual nasa hle. Chutah chuan, ka rilru min mawlh nasa em em gospel chu ngaihthah chi a ni tawh lo tiin, ka thlenna room-ah tawngtaina leh Bible nen ka inkhung a. Bazar-a chhuah an tih pawhin ka chhuak duh lo va; khawiah emaw kal tura min sawm pawhin, inah awm ka thlang, inah tawngtaina nen ka inkhung a. Chutianga hun ka hman thin hnuah, gospel lam chauh hawi tawh turin thutlukna ka siam thei ta a ni,” tiin thutlukna a siam dan Zalen Thalai Khawvel a hrilh.

 

 RS-a chuan lengzem atanga gospel-a a inlet ta chu, a dinhmun thlirin huphurhawm hle nia a hriat thu sawiin, “Gospel-ah ka inlet hi, a tirah ka rilru a insual buai nasa a. A chhan chu, naupang tein chhungkaw pa chan ka chang a. Ka nu leh ka naute enkawl ngai an nih avangin, sum leh pai lam pawhah dinhmun ka insiam ngai lai tak a ni a. Chhungte ngaihtuahna a nasa a, a lehlam zawng takin ka huphurh em em mai a ni. Mahse, Pathianin min kohna hi a nung tlat avangin, kei leh ka chhungte hma lam hun pawh Pathian kutah ka nghat tawp mai a ni,” a ti bawk.


Latest News & Chhiar Hlawh