ZALEN, Feb 06, 2025: Mizo Zaimi Inzawmkhawm (MZI) General Headquarters-in kumin Valentine’s Day, February 14 hian chhun lamah mobile charity concert buatsaihin zanah Berawtlang Tourist Resort-ah concert an buatsaih dawn bawk.

MZI Valentine’s Day Mobile Charity Concert hi rualbanlo naupang, enkawltu mumal nei lote enkawlna, Bethsaida Children’s Home, Durtlang puala neih tur niin chawhma dar 10:30-ah Sikulpuikawn-ah Vanlalsailova’n hunserh hmangin a hawng dawn ang.

Zaithiamte an zai bakah mahni remchan leh phal ang tawka lei theih turin rose par zawrh a ni ang a, hemi atanga sum lutte chu children’s home-ah hlan tur a ni ang.

Sikulpuikawn bakah hian chhun dar 12:30 atangin Israel Point, Dawrpuiah hun an hmang zui ang a, chawhnu dar 2 atangin Chanmari kawnah an ti bawk ang.

LPS Youth Icon Lalsangliana (Taitea) leh Icon star dang - J. Lalrosanga, Ramengmawia (Mawimawia), Peter Lalnunpuia, Lalbiakkima Hnamte (Bka), Zothankima (Kimkima) te bakah Zoramchhani, Youngfella, Smiley, Spi te leh hranghlui - Ngurthangvela, Vanlalhlana, Peter C. Lalrinmawia leh Muanpuia (Dreamhunter) te pawh an inlan dawn a ni. 

Berawtlang Tourist Resort-a tlai dar 6:00-a tan tur concert-ah hian Rsa hovin zaithiam eng emaw zat an che leh dawn a, ticket Rs. 200 man a ni ang.

Concert-na hmunah hian ei leh in tur chi hrang hrang bakah duhsak zawngte pek tur rose par lei tur a awm ang.

Ticket hi online-in (Gpay hmangin) a lei theih dawn a, chhun lama mobile charity concert-ah zawrh a ni bawk ang a. Online-a leite tan gate/entry-ah payment receipt hmangin mahni ticket tur lam mai tur a ni.