India hmarchhaka Manipur-ah chuan tharum thawhna a thlen thar leh avangin army leh paramilitary force koh luh thar leh an ni.

Meitei leh Kuki te chu Thawhtanni khan state khawpui, Imphal-a New Checkon-ah an intibuai leh nia sawi a ni a. Buaina hi tual chhung bazara hmun inchuh atanga chhuak nia sawi a ni.

Buaina a chhuah thar leh avang hian heng lai velah hian curfew puan thar leh a ni bawk.

Manipur-ah hian chi leh chi inkara inrem lohna leh buaina hi thla khat chuang kal ta atang khan a lo chhuak tawh.

May 3 khan tlangram state-ah hian Meitei-ten Scheduled Tribe status nih ve an phutna duh lova tribal-ten kawng zawh lian tham tak an huaihawt atangin buaina nasa tak a chhuak a. Chawlhkar khat chuang tharum thawhna thlengah mi 70 chuang an thi.

Buaina chhuakah hian in leh lo leh thil dang cheng vaibelchhe tel man hal chhiat a ni a. Mi tam takin an in leh lo chhuahsanin sorkarin awmna tur a siamah an awm phah a, tam takin state thenawm an pan bawk.

Buaina hi reserve forest ram chin khuaa Kuki chengte um chhuah tumna atanga intan niin a hma daih atang tawhin boruak a inmung tawh.

Manipur-a mi cheng tam ber hi Meitie niin 64% (sawi dan a inang chiah lo) a ni a, state chhunga ram 10% emaw chauh an chang thung a, tribal ni ve lo tan tlangram chinah ram lei phal a ni lo bawk.

ST category-ah an tel chuan ram zau zawk an lei thei dawn a, hei hi tribal-te chuan an luah lai ram an chân theihna tur leh kawng hrang hranga an chanpual an chân theihna tur nia ngaiin an duh lo.

Thla tira buaina a chhuah hnuah khan army leh paramilitary force-te chuan an la awmchilh reng a, an patrol thin bakah civilian-te an pui thin.

Union Home Minister Amit Shah chuan tharum thawhnaa inhnamhnawih chu na taka hrem an ni dawn tih a sawi a, intibuaite hi an aiawh ve ve pawh a kawm tawh bawk.