– Rev. Lalbiakhlira

Mizo Kristian chhûngkaw hlauh tak mai pakhat, phung hlauh taka kan hlauh chu "in dàn khelh" hi a ni âwm asin! A hlauhawm loh; intihhmuh chi a ni zâwk e.

1. In khata chhûngkaw hnih thum chênho dur dur hi ropuiin kan hre thin. A dikna chen a awm. Mahse, ngaihtuah chian chuan a ropui lo. Chhungkaw chak lo zia a ni. In dang thei lo khawpin kan inpawt bet a, kan inkuah no, kan indîp, kan intisawngnawi! Nu leh pa, tar chak lo zara nung mai mai chhungkua kan tam lutuk, a zahthlâk zo zai tawh e.

2. In khata chênho dur dur hi, thisen inzawm mah ni ila, buaina chi hrang hrang kui tiahna lei dür tha-mi a tling. Insiamrem ngâi a tam, en liam chawp ngâi a tam, ngaimawh neih a remchâng lo, ngaihdân neih ngawihpui a ngai, thil thar tihchhuah fo a rem lo. Buai a hnâi! Mualpho kan hlau si, nun a tâwt, a ipik!

3. Mo sual siamna a ni. Mahni seilenna hmun pawh ni lo, chhungkaw la hriat chian loh, ze chi hrang hrang hrawn tharna hmuna pasalte avânga lawilût mai an ni a. An tan a harsa lutuk! Mizo hmeichhia pasal neite zînga insiamrem thiam hi rin ai daihin an tam, an fakawm. An rilru a hrisêl a, Pathian an tih hle a ni phawt mai. Hetiang kâra mo tâl buai, insiamrem thei lo an lo awm hi dem theih an ni lo ang. An tân a harsa lutuk mah mah a ni.

4. Chhungkaw tam tak buaina chu in dàn khelh boruak a ni. Engati nge, a khelha khelh kher ngâi loa kan in dan mai zel loh le? Khelh hmâ boruak that lâi chuhin in dan lam hawi thuai ila a fuh ber. Sebo hnua se kawng khar loh i zir teh ang u.

5. Chhungkaw khata kan che ho dur dur hian hmasâwnna a dâl. Inrinthulh a awl. Ei tling lo kan awm duh. Mi dang zara nung mai mai leh pian to tha loah kan inchhuah. A tawi zawngin, kan indîp a, chhûngkuain rah a chhuah tha thei lo!

6. "Sâpho chu nupui an nei a, an in dang mai zêl" kan ti a, kan sawi huai huai mai! A dik ang, an fing tawh a, in dan thatzia an hria a ni mai. Chhura chêngkek lo tur ang mai, mahni tih theih reng ti thei lova inngaih hi bânsan a hun. Sâpho pawhin an tih chu kan ti thei.

7. Huphurh lutuk duh suh. In tha takah chên nghâl a ngâi lo. Nitin sa hmeh nghal a ngâi lo. In thang zel dawn alâwm. Zu in vêl mai mai hman i ni lo. Pathian rinchhan chungin hmasawnna chauh ngaihtuah rawh. NREG te, ration man tlâwmte hi a tangkai vek. Pa tling puiin "Khaw maw, ka pa, top-up man..." tih dût dût reng tur a ni ngâi lo e. 

8. In dan avanga inhuat zui kher tur a ni hleinem maw le. Kan inngaihsak zui tur a ni zawk. Chhungkaw hotu berin vil zui ila, chhawm ila, mahni kea ding turin zirtir ila, a chelhna hrui thlah dul hret hret thiam ila a tha alâwm. Kan in awp khur a, a hnuah, "Mi fate in ang lo!" kan ti leh a! An puitlin hmâin an târ hman ziah! Thufing pakhat chuan, "I fate sangha pe suh, a ei zo ang a, a dil leh thin ang che. Nghakuai pe la, sangha man zirtir zâwk rawh" an tih ka hria. Inkhawngaih loa inhmangaih kan zir a ngâi.

9. In dan tawh hnuah a tul a nihte chuan, in pui lamah kan lêt leh mai tur alâwm. Enkawl ngâi, tanpui ngâi kan awm a nih chuan inen liam a thiang lo. Mizo, Kristian, nakin lawka Vânram kâi tur kan nih kha. 

Khai le, a thei thei chu i in dang sang sang teh ang aw. Puitlin a hun tawh, kan zeng nasa lutuk hi a pawi. Kan chhungkaw kalhmang hian IAS chu sawi loh, hmasâwn a support lo a nih hi!