Tunlai ang em ema zu kan sep nasat hi Mizoramah a la awm ngai awm lo ve – chanchin buah, tv-ah, titihonaah leh biak in lam thlengin kan sawi a, kan ziak a, kan chhiar a, kan ngaithla a, ngaihsak loh hleih theih loh khawpin a ri chamchi a ni ber mai. Zu in mi ka ni lo nain zu vanga tuar chhungkaw zingah chuan ka tel ngei tih ka pha lova – zep nak emaw, ka fapa neih ve chhunin, kum 39 a pumhlum hmaa min thihsan ta mai kha, zu vang a ni ti ila, tu man min hnial lo vang. Chuvangin, zu hi tihrem theih tak tak ni ta sela chuan, a lawm ber tur zinga mi ka nih ka ring. Zu khapbeh (total prohibition) chungchanga Mizoram sawrkar leh Kohhran hruaitute a lang-a-pauva an inep ta mai hi erawh chu a pawi ka ti a – tute tan pawh thusawi fimkhur a tul lai tak a ni awm e. Huaisen taka kan sawi ngam tur chu ‘zu’ emaw ‘zu in’ emaw hi amahin sual a ni nghal hrim hrim ringawt lo, tih hi. Pathian thu (Bible) pawhin a huat (duh loh, paihthlak) chu ‘zu ruih’ a ni. “In lovin zu a ruih ngawt theih hlei nem, zu ruih a sual chuan, zu in pawh a sual a ni mai alawm” kan ti a ni mai thei; chutia a bawp lawka kan lak dawn chuan, “chaw ei tam lutuk (gluttony)” pawh kan Pathian thu chuan sualah a chhiar asin. Sawi tak zelah chuan kan Lal Isua ngei pawhin tui uain-ah a chantir (Johana 2:1-11) tih kan hria a; amah ngei pawh, “En teh u, chaw heh mi, uain heh mi, chhiahkhawntute leh mi sualte thian saw!” (Luka 7:34) tiin a hmelmaten an kawk a nih kha. Amah Lal Isua ngeiin, “Mihring pawn lam ata a kawchhunga luta amah tibawlhlawh thei engmah a awm lo; mihring kawchhung ata lo chhuakte chu mihring tibawlhhlawhtu a ni zawk e,” a ti a. (Marka 7:15) “Tupawh beng nei chuan hre rawh se,” a ti zui nghe nghe a ni. Tirhkoh Paula pawhin Timothea hnenah, “Tui chauh in mi ni tawh suh la, … uain tlem te hmang thin ang che,”(1 Timothea 5:23) a ti bawk a. Hetiang thute kan Bible ngeia inziak chhiar mai theih tur a awm laia, a ni lo luakchhuaka zu pawng hnawl chiam chiam hi a ‘Pathian thu’ em tih kan ngaihtuah ve a pawimawh khawp mai. A in lote hian zu hi kan lo rui lutuk ve mai ang tih a hlauhawm hlel lo a nia!