ZALEN November 3, 2024 : Mizorama cyber crime zingah sum kaihhnawih inbumna a tam ber a. Kumin thla kaw chhungin sum kaihhnawiha inbumnaah cheng vaibelchhe 8 chuang a kal ral.

Mizoram Journalists’ Association leh Mizoram Police chuan tun hnai khan Mizoram khawpui hrang hrangah cyber crime zirhona an buatsaih a. He huna thusawitu Mizoram Police cyber crime thawktute chuan cyber crime inbumna zingah sum kaihhnawih inbumna a tam ber tih sawiin case an neih 80% deuh thaw chu sum leh pai inbumna a ni tih an sawi a. Kumin January atanga September inkar chhunga sum kaihhnawih inbumna chu Rs. 8,00,31,849.35 a tling niin an sawi.

Sum kaihhnawih inbumna hi January-ah Rs. 60,86,864, February-ah Rs. 67,91,615, March-ah Rs. 1,59,97,245, April-ah Rs. 30,86,751, May-ah Rs. 28,05,724, June-ah Rs. 38,84,718, July-ah Rs. 2,57,36,078.77, August-ah Rs. 24,35,072 leh September-ah Rs. 1,32,07,781.58 te a ni tih an sawi.

Sum inbumna kaihhnawih hi hmuh let leh a har em em a, inbumna zinga 10% vel chauh an hmu let thei niin an sawi bawk.

Cyber crime thawktute chuan sum leh pai inbumna zingah army scam chu tam berin mi sualte hian sipai lemah changin tlawm deuh deuhin thil an zuar a, hrechiang loten pawisa pein sum thahnem tak an hloh thin niin an sawi.

Mi bum ching hi a tlangpuiin Bihar, Uttar Pradesh leh Jharkhand vela mi sual an ni deuh ber niin an sawi bawk.

Sum kaihhnawih inbumna zingah mipat hmeichhiatna rawngkai (sextortion) hmanga mi vau chu a hluar hle niin an sawi bawk a. Mi sualte hian video call hmanga biain an mi biakte chu inphel ruak turin an ti a, chu chu lo record-in a hnuah pawisa an pek loh chuan an sex video chu tihdarhah an vau leh thin niin an sawi bawk.

Cyber crime thawktute chuan internet hmanga inbumna kaihhnawihah hian chawhrualin nitin FIR 20 vel dawng ang an nih thu an sawi a. Report lut lo engemaw zat a awm niin an sawi bawk.