India ram hian national day pathum — Independence Day, Republic Day leh Gandhi Jayanti kan nei a, heng zinga pahnih Independence Day leh Republic Day te hi state capital, district capital zawng zawngah sorkar ruahmanna anga hman thin a ni. Mizoramah pawh sorkarin thuchhuah siamin heng ni pawimawh pahnih hmannaa tel turin sorkar hnathawkte pawh ngun takin a hriattir a, officer lian chin phei chu an thutna tur ruahmansak a, hauhsak an ni thin. Mizoram bikah hian sorkar hnathawkten heng national day te hi an ngai pawimawh lo hle a, officer te thutna tura ruahmante phei chu a ruak nasa thei hle. Kumina national day pahnih kan hman tawhte pawh sorkar hnathawkten an ngai pawimawh lo hle tih a lang a, officer lian zawkte thutna tura ruahman leh hauhsak te a thawl hle. Sikul naupang parade-a telte an sikulin an tawiawm a, chu chuan kan national day a tizahawm hram hram a, a nihna takah chuan heng sikul naupangte hi national day hmannaah hian tel ta lo sela, eng tham mah Lammual kal an awm hauh lo vang, kan ram hruaitu pawimawhte hian ngaithlatu awm lovin thu an sawi mai mai lo vang tih a sawi theih loh. National Day pawimawhna hi sorkar hnathawkte hnena kan inzirtir ngawrh a tul hle, sawi tawh angin sikul naupangte chuan a pawimawhna hriain he hun hi an hmang thin. Sorkar hnathawk tam zawkte hian a chhawrtu sorkar, zalenna a hmuh champha, republic ram a nih champha a ni tih kan hriat thar a tul hle. India nationalism emaw, Mizo nationalism lam hawia thendarh chi a ni lem lo, kan chenna ram sorkar ni pawimawh ngaih pawimawhna chang kan hriat loh chuan hnam hmantlak kan ni ngai lovang. Mizo kan nihnaa kan chian a tul rualin India khua leh tui kan nihna kan theihnghilh hi a thiang lo. Remna Ni kan lawm thinte hi India Independence Day awmlo sela, kan lawm kher ang em tihte thlenga kan ngaihtuah a ngai. Kan hnam leh kan state milpuia ‘Ni’ kan neihte hi kan ngai pawimawh tur a ni, kan kut te leh kan state ni bikte hi kan ta bik an nih avangin kan ngai pawimawh tur a ni, chutiang bawkin kan state awmna ram ni pawimawhte kan ngaih pawimawh a tul hle. Sikul leh sikul naupangte chuan he ni pawimawhna hi an hrechiang viau tawh a, an ngai pawimawh hle bawk. Kan sorkar hnathawkte hian heng ni pawimawhna hi an hria a; mahse, an ngai pawimawh tawk lo niin a lang. Sorkarin heng ni pawimawh bikte urhsun leh uluk taka a hman thinte hi a hnuaia thawktute hi ngai pawimawh zual zawk turin zirtir sela, kan ram ni pawimawh kan tihzahawm loh chuan a zahawm lo tur chu keimahni bawk kan ni tih kan hriat a tul hle.