India rama naupangte tana buatsaih badminton inelna sangah Mizo naupang an langsar a, Sainunmawia Sailo-in bronze medal la phakin hriat hlawh tawh, Malsawmhlua (Mama) erawh a kawppui kumah buaina an tawh avangin semifinal-ah paih thlak an ni a. Hetiang bawk hian Zonunthari Renthlei chungah a thleng bawk.

Kar liam ta chhunga JSK-Chetan Anand Sports Centre, Ameenpur, Miyapur, Hyderabad, Telengana-a Yonex-Sunrise All India Sub-Junior Ranking Badminton Tournament 2024-ah Ramhlun Venglai rawlthar, Sainunmawia hi Ishita Negi nen Under-17 Mixed Doubles huangah inkawpin anb inlan a, bronze medal an la.

Sihphir Badminton Club-a khel mek, Sainunmawia te thian dun hi qualifying round-a vawi thum an chak hnuah quarter final-ah Sachin A. leh Ananya A. te tangdun chu 21-16, 21-13-a hnehin semi final an lut a. Final luh inchuhnaah Manish S.Reddy leh Deepak Raj Aditi-te tangdun chu 21-19, 19-21, 15-21-a hneh zo lova tlain pathumna zingah an tel a ni.

Sainunmawia hi Under-17 Boy’s Doubles-ah Vanlalpekhlua Sailo nen inkawpin an inlan bawk a, quarter final thlengin semifinal luh inchuhnaah Seeded No. 3 Bala Pranay Pragda leh Pranit Somani te tangdun chu 21-18, 21-11 in an hneh lo hlauh a ni.

U-17 Boy’s Doubles huangah tho hian India rama a rualpuite zinga hriat hlawh sa, Serchhip rawlthar, Mama pawh a kawppui nghet sa, Mahendra Kalahasti nen tangduna inlan lehin, quarterfinal-a Gokul K. leh Vishank Surendar te tangdun chu 21-18, 21-12-a an hneh hnuah semi final khel tura an inbuatsaih lai mekin an tumpui turten Kalahasti-a kumah hekin a Adhaar card nena an thlunzawm a pa phone no an lo hmang tawh si lo va, finfiah mai theih a nih tak loh avangin walk over-a paih thlak an nih phah ta a ni.

Mama leh a kawppuiten an hmachhawn turte hi an lo hneh fo tawh an ni a, final pawh lut se an hmabakah hnehna chang leh zel tura an an inringtawk em em chungin final an invaw kai thei ta lo a ni.

Mama leh Kalahasti te buaina ang bawk hian Mizo naupang dang, Zoramthari Renthlei, Champhai pawhin tawngin Under-15 Girl’s Doubles-ah champion lai an vuak thlak hnuah a kawppui kum avang bawka hekna tawngin Adhaar card atanga finfiah mai theih a nih loh avangin quarter final khel mai tur chu walk over-in an chak loh phah bawk.

Champhai tleirawl, Zoramthari hi Under-15 Girl’s Singles-ah inlan bawkin round of 32 a thleng a. Vanlalhruaia Sailo chuan Under-15 Boy’s Doubles-ah round of 16 thlengin Under-17 Boy's Doubles category ah qualifying atanga tanin round of 32 a thleng thei bawk.

Mizo naupang te hi TATA Trusts, NEIDA, Mizoram State Sports Council (MSSC) leh Mizoram Badminton Association (MBA) te thawhhona atanga chherchhuah, Kotak Pullela Gopichand Badminton Academy (KPGBA), Hyderabad leh ITM University Badminton Academy, Raipur-a TATA Trusts (NEIDA) sponsor-a awm mekte an ni.

MBA chuan Mizo naupang, Mizoram hming tithatute hi a chhuang a, dinhmun sang zawk leh hlawhtlinna ropui zawk an chan zel theih nana theihtawp chhuah zel turin duhsakna a hlan tih an sawi.