Tun hnaiah Mizoramin India rama tual chhung cricket inelna sang, Duleep Trophy-a khel thei a lo nei tawh a, tunah pawh inelna sang dang, Deodhar Trophy-a khel thei player a nei leh dawn ta.

Board of Control for Cricket in India (BCCI) hnuaia zone parukte limited over-a an inelna, Deodhar Trophy khel tur hian Chhinga Veng Cricket Club wicketkeeper/batsman Jehu Anderson chu India hmarchhak aiawh tura thlan zingah a tel a ni.

Kum 23 mi, Dawrpui Vengthar tlangval, Jehu-a hian Thawhtanni hian an camp-na tur leh an khelhna hmun tur ni bawk, Puducherry a pan dawn a, July 17 atangin an khel tan ang.

A pa tan Jehu-a
ZALEN-in a biaknaah Jehu-a chuan a tournament khelh tur chu a pa tan a hlan tih a sawi a, “Pathian hmingin ka pa, Rev. Jeremiah Anderson tan ka hlan a, ani hi ka tet tê atanga min tuipuitu a ni a, vanduaithlak takin nikum hmasa (2021) khan min boralsan tawh a, tun tuma Mizoram aiawha North East Zone hminga ka inkhelh tur hi atan ka hlan a ni,” a ti.

“Tun dinhmun thleng tur hian ka thawk rim a, Pathian zarah khelmual luh (playing XI) phak ngei ka inbeisei a, ka tum bawk,” a ti.

Cricket-ah hian team (squad) khatah player 15 an awm thin a, heng zingah hian Jehu-a pawh a tel a, squad-a tel ngawt lova khel tura thlan chhuah mi 11 zinga tel turin a bei dawn a ni.

Jehu-a chuan, “CAM hruaitute chungah lawmthu ka sawi a, ka talent min hriatsakin ka than zelna turah hma min lakpuina te avangin ka lawm hle a ni,” a ti a. A khelhpuite nena thahnemngai taka Mizoram cricket-in hma a sawn zel theihna tura theihtawp an chhuah tlan avangin nuam a tiin team boruak pawh a tha hle a, hei hian a tihlim tih a sawi bawk.

Mizoram mipuite pawhin lo tawngtaipui se a duh tih Chhinga Veng batsman chuan sawiin, “India hmarchhak hi cricket khawvelah kan la naupang a, hma kan sawn zel theih nan leh tuna kan inkhelh tur, Deodhar Trophy pawh tha taka kan khelh theih nan Mizoram mipuite pawhin Pathian hnenah min lo tawngtaipui thin dawn nia,” a ti.

Deodhar Trophy chu eng nge?
Devdhar Trophy ti pawha an sawi thin inelna hi India-a List A cricket tournament a ni a, tournament san dan indawta a sang ber (List A) tihna a ni a. D. B. Deodhar (Grand Old Man of Indian cricket) hming chawia a hming vuah niin over 50-a khelh thin a ni.

A khelh dan hmang hi thlak kual fo a ni a, kum 1973-74 season atanga khelh tan a nih atanga 2014-15 thleng khan BCCI hnuaia zone hrang hrangte inelna atana hman thin a ni a. Hemi hnuah hian India A, India B leh India C inelna atana hman leh niin a hnuhnung ber, 2019-20 khan India B an champion a ni.

Jehu-a inlanna tur hi
Mizoram batsman Jehu-a inlanna tur, 2023 Deodhar Trophy hi a khelh dan tidanglam leh hretin zone hrang hrangte inelna atan hman a ni leh dawn a, July 24 atanga August 4, 2023 chhunga khelh tura ruahman a ni a, kum 2014 hnua zone inelna atana hman leh hmasak berna tur a ni.

BCCI hnuaia zone paruk - Central, East, North, North East, South leh West Zone te an inel dawn tihna a. Jehu-a leh a thiante hian zone tin hi an inkhel kual chhuak vek ang a, a sang pahnihin final an khel dawn a ni.

Kumina a thlengtu, Puducherry-a khelmual pathumah ni khatah round khat zel an khel dawn a. July 24, 26, 28, 30 leh August 1-ah inkhelin heta a sang pahnihte hian August 4-ah final an khel ang.

Mizoram cricket-in hma a sawn
Mizoramah cricket hian hriat a hlawh lutuk ngai lo va, Cricket Association of Mizoram (CAM) pawh kum 1992 daih tawha din ni mah se kum 2018-ah BCCI-a a inziah luh theih chauh avangin hruaitute tan pawh hmalak chak a har hle thin (BCCI-ah hian association din ruala inziah luh ngawt a remchang lo va, tih tur tam tak a awm avanga inziak lut mai lo a ni).

BBCI-a a inziah luh hma atang tawha theihtawpa beihnain rah tha chhuah zelin tunah hian CAM leh player-ten hma an sawn hle a. Tun hnai lawkah Ramhlun Venglai Cricker Club batsman Joseph Thankhuma chu Duleep Trophy-ah North East Zone aiawh tura thlan zingah a tel a, North Zone nena an inhmachhawnah a khel phak zingah telin Mizo zinga he intihsiakna sanga inlan thei hmasa ber a ni ta nghe nghe.

Duleep Trophy khel tur hian a hma pawhin Mizoram player thlan an lo ni tawh thin a; mahse, khelmual tak erawh an lut pha ngai lo.

Kumin Deodhar Trophy-ah pawh hian CAM chuan mi pathum ngawt a thawh chhuak leh dawn a, Jehu-a bakah hian Vikash Kumar, Electric Veng chu stand by-ah a tel a. North East Zone team manager atan CAM-a Men’s Selection Committee Chairman ni lai, Raj Kumar Joshi chu a tel dawn bawk a ni.

CAM hian Sihhmuiah Suaka Memorial Cricket Ground sual chhuak tawhin tunah hian an president, Lalrochuanga Pachuau te chhungkuain ram an pek, Tanhrila a dang sa leh turin bul an tan leh mek tawh bawk a ni.