Most Beautiful Women in India 2024 list-ah Aishwarya Rai Bachchan chuan dinhmun sang ber a luah vang mai. Nu a nih hnuah pawh a hmelthatna leh duhawm a la chuai chuang lo a, mite duh rawn a la ni reng. Pahnihna pawh Bollywood star Alia Bhatt a ni a, Bollywood lamin an thawh hlawk hle. 

Abhishek Bachchan-a nupui Aishwarya Rai hi kum 50 mi lai a ni ve tawh a, upa pawl member nih a hnaih ve tawh hle. Kum 1994 khan Miss World atan thlan a lo ni tawh a, India tihmingthatu a ni. Miss World a nih hnu hian lemchan lamah a lut zui a, Filmfare Award pawh pahnih chu a lo hum haw ve tawh a ni. Time chuan khawvela huhang ngah zual mi 100 a thlan chhuah zingah an lo telh tawh bawk a ni. 

British-Indian actress Alia Bhatt hi kum 31 mi a ni thung a, Bollywood mai ni lo Hollywood thenga hriat hlawh a ni. A hmelthat bakah lemchan a thiam em avangin hriat a hlawh a, India hmeichhe zingah chuan huhang ngah ber zinga mi a ni. Kum 37 mi Sonal Chauhan hi fashion model, musician leh actress a ni a, top 3-ah a lang hi a mak lo. A hmelthatna leh a thiam thil hrang hrang hmangin sang takah a invawrh a, social media lamah pawh zuitu a ngah hle. 

Palina dinhmun hauhtu chu kum 34 mi Angela Jonsson a ni a, a buatsaihtute lamah kum naupang aiin kum upa lam hret an tlana a ni mai thei. Angela hi model leh actress a ni a, kum 2011 khan Kingfisher Calendar Model Hunt title a lo la tawh nghe nghe. A hnuai chiahah hian Zoya Afroz a awm a, ani pawh model leh lemchan thiam tho a ni. Crown Ponds Femina Miss Indo 2013 atan thlan a lo ni tawh bawk. 

Top 10-ah hian - Tamanna Bhatia, Janhvi Kapoor, Malavika Mohanan, Shweta Tiwari leh Rakul Preet Singh te an lang a, an zingah hian Janhvi Kapoor (27) chiah kum 30 pel lo a awm a ni. 

Top 10 Most Beautiful Women (India 2024) : 

1. Aishwarya Rai Bachchan

2. Alia Bhatt

3. Sonal Chauhan

4. Angela Jonsson

5. Zoya Afroz

6. Tamanna Bhatia

7. Janhvi Kapoor

8. Malavika Mohanan

9. Shweta Tiwari

10. Rakul Preet Singh