India chuan Chinese application 54 zet khap a nih leh tur thu tun hnai khan a puang a, chung zingah chuan game lar tak Garena Free Fire pawh a tel. 

Ministry of Electronics and Information Technology chuan thuchhuah siamin Chinese app khap a nih tur thu hi a puang a, kum 2020 pawh khan app tha hnem tak khapna thupek a lo tichhuak tawh bawk a ni. Heng app te hi ram himna tiderthawng thei tiin section 69A of the IT Act tlawhchhanin khapna thupek hi tichhuah a ni. 

Chinese app lar ber ber - PUBG Mobile, TikTok, Weibo, WeChat, AliExpress leh a dang eng emaw zat chu India ramah khap a ni a, ram pahnih inkarah pawh boruak a awm phah hat a nih kha. June 2020-ah mobile app 59 khapna thupek tihchhuah phawt a ni a, September 2020-ah app 118 khap a ni leh bawk - Chinese app khap tawh zawng zawng hi 300 a chuang tawh.  

Tun hnai khan Chinese app 54 zet khap a nih tur thu Ministry of Electronics and Information Technology chuan a puang leh a, chung zingah chuan - Beauty Camera: Sweet Selfie HD, Beauty Camera - Selfie Camera, Equalizer & Bass Booster, CamCard for SalesForce Ent, Isoland 2: Ashes of Time Lite, Viva Video Editor, Tencent Xriver, Onmyoji Chess, Onmyoji Arena, AppLock leh Dual Space Lite te pawh an tel. 
Hetih rual hian Singapore-based Sea Ltd's (SE.N) game 'Free Fire' chu khap tur zingah hian a tel a, security thil vang a nih thu sawrkar thuchhuah chuan a tarlang. 

Free Fire
Battle royale game Free Fire hi 111dots Studio ten an develope niin, Garena ten an publish thung. Kum 2017 khan release niin, Android leh iOS-ah khelh theih ve ve - 2019 khan khawvel pumah mobile game download nasat ber a ni hial!  Daily active user mi maktaduai 150 zet awmin record a siam hial a, September 2021 khan Free Fire Max version tihchhuah leh a ni bawk. 

Free Fire hian nikum khan PUBG Mobile chu US bikah khumin, quarter khat chhungin $100 million zet a lalut a, he tih hun chhung vek hian PUBG Mobile chuan $68 million a laut thung.