India innghahna Adline Castelino

Admin - May 16, 2021

Miss Universe India 2021

Miss Universe 2020 thlannaah hian Miss Diva 2020 Adline Castelino chu India aiawhtu a ni a, a chanchin hian ngaihven a hlawh hle. Kum 22 mi Castelino lakah mipuiin beiseina a sang a, India hming that leh that loh tur chu a kutah a innghat mek a ni. 

Tunge Castelino chu?
Adline Mewis Quadros Castelino hi July 24, 1998 khan Kuwait-ah a piang a, a nu leh pa Alphonse leh Meera Castellino te hi Udyavara, Udupi, Karnataka khaw chhuak an ni. Thlahtu atanga India chhul chhuak an nih avang hian Castelino pawh hian Indian Central School, Kuwait-ah lehkha a zir thin a, kum 15 a nihin India-ah an chhungkua hian an rawn kir leh a ni. Castelino hi Mumbai-ah an inbengbel zui a, St. Xavier's High School-ah zirna a chhunzawm. Hemi hnu hian Wilson College-ah kal lehin Business Administration-ah Bachelor degree a nei a ni. Tawng chi li - English, Hindi, Kannada leh Konkani te a thiam. 

Beauty pageant
Castelino hi kum 2018 khan online-a beauty pageant thlannaah a inlan a, hriat a hlawh lem lo. Hemi hnu hian hmasawnna duhin Cocoaberry Training Academy, Mumbai-ah a inziak lut a, 2019 khan a zirna institution hian 'Miss Cocoaberry Diva' atan an thlang nghe nghe a ni. 

Kum 2019 vek hian Miss Diva atan Chennai audition-ah a inlan zui a, finalist a ni. Miss Diva 2020-ah inlan lehin, India rama nula hleitling, pian nalh leh thluak tha zingah 'ber' nihna hauh zuiin 'Miss Diva Universe 2020' atan thlan a ni. 

Miss Diva hi Miss Universe thlannaa India aihawmtu tur a nih angin Castelino pawh hi a inlan zui a, Miss Universe crown a rawn hawn thei ang em tih chu a chiang thuai dawn a ni. 

 

Share now