DOWNLOAD OUR APP

Read latest news on your phone
app-store
India khawthlangah tek leh rial vangin mi 24 vel thi
Nov 27, 2023

Tek nasa tak tla bakah ruah leh rial tla avangin India-ah mi 24 vel an thi niin thuneituten an sawi.


Khaw awm dan uchuak tak hian khawthlang lam, Gujarat-a chenna in tam tak tichhiain ran vulh tam tak an thi bawk.


Meteorologist-te chuan thlasik laia ruah sur chiam hi Gujarat-ah a awm ngai lo niin an sawi a, hei vang hian ruah sur tam takah mi pawh an inring lo niin an sawi.


India-ah hian kum tin sabereka khuangkaih leh tek avangin mi sang tel an thi ziah a. Scientist-te chuan khawvel lum zel avangin sik leh sa uchuak tak tak a tam sawt dawn niin an sawi lawk bawk.


Khawmual leh tuipui chung a lum avangin ruah insiam a awl a, chu chuan tek pawh a thlen tel thin.


India khawthlang lamah hian Thawhtanni pawh khan ruah leh rial a la tla nasa hle bawk.


Pathianni zan tlai tawh taka sorkar thuchhuah chuan thi 24 zinga 18 vel chu tek den avanga thi niin an tar lang.


Gujarat-ah hian Pathianni leh Thawhtanniah khan ruah tam tak a sur a, rial leh tek a tla nasa hle bawk a, darkar 24 chhungin ruah hi mm 144 zet a tla hman niin sorkarin a chhinchhiahnaah tar lan a nih thu Reuters news agency chuan a tar lang.


Ahmedabad-a Indian Metrological Department hotu, Manorama Mohanty chuan Gujarat-ah hian weather system chi thum intawk khawm a awm avangin tek hi a tla nasa zual niin a sawi.


“Arabian Sea atangin khawchhak lam hawiin thli a lo thawk a, Himalaya tlangdung khawthlang atangin Western Disturbance a lo thawk a, Gujarat chhim lamah Cyclonic Circulation a awm bawk a ni,” tiin Mohanty-i chuan BBC hnenah a sawi.


Union Home Minister Amit Shah chuan thihna thleng chu ‘a pawi ti tak zet’ tih a sawi a, tual chhung thuneitute chu chhanchhuah leh chhawmdawl hna thawk zung zung turin a ti nghal.


Lo neitu pakhat, kum 42 mi, Yogesh Patel-a chu ruah a sur nasat em avangin a lova thingkung hnuaia a thu chu a inphenna thing tekin a den avangin a thi.


An chhungkaw thian hnai tak, Shantilal Patel-a chuan a thianpa hian a nupui leh a fate pathum a kalsan niin BBC a hrilh.


“A lova thing hnuaia a thu lai tek hian a deng a. A ruang kan va hmuh chuan a inte vei lama a ah a mobile phone chu tek avang hian a puak niin a lang a, a hmunah hian a thi nghal a nih hmel,” a ti.


India-ah hian kum 1967 leh 2019 inkar khan tekin mi 1,00,000 chuang zet a deng hlum tawh niin sorkar chuan a chhinchhiah a. Hetih hun chhunga khuarel chhiatna avanga thi zawng zawng hmun thuma thena hmun khat aia tam zet an tling.


Tun hnaiah India-ah hian tek a tla tam zual a, a den hlum erawh an tlem deuh tawh thung a. Hei hi thuneituten tek tla laka himna tur a duan avang te, khaw chin sawi lawk a that avang te a ni pakhat.


India-ah hian April, 2020 leh March, 2021 inkarah tek vawi maktaduai 18 chuang a tla tawh niin hlawkna nei lo pawl, Climate Resilient Observing Systems Promotion Council-in a zirchiannaah tar lan a ni a. A hma kum khat aiin 34% zetin a tla tam zawk a ni.

MSSSB thiah leh thiah loh
Mizoram Subordinate Services Selection Board thiah tum hi eng nge i ngaihdan?
Thiah tha ka ti
Thiah kher tul ka ti lo
Ka hrethiam lo

Latest News & Chhiar Hlawh