Aizawl August 11, 2024 : India rama kohhran inzawmkhawm pawl 'National Council of Churches in India' ruahmanna in vawiin khan an hnuaia kohhran hrang hrangte chuan National Day of Prayer & Protest an hmang a. Mizoram Synod erawh chuan remchan zawkna avangin he hun hi Zirtawpni khan Synod office-ah Rev. V.L. Luaia Hranleh, Executive Secretary kaihruaiin hman a ni.

He ni hman anih chhan hi kum 1950 khan dan pakhat, 'The Constitution (Scheduled Castes) Order' chu pass a ni a, chu chu 'Presidential Order 1950' ti te pawhin an sawi bawk. He danah hian 'Hindu sakhaw betu ni lo chu Scheduled Caste an ni thei lo vang' a inti a ni.

Kum 1956-ah he dan hi siamthat hlek a ni a, chutah chuan Sikh sakhaw betute an rinlut tel ta a. 1990 khan siamthat leh niin Buddhist sakhaw betute pawh rinluh tel an ni ve leh a. Amaherawhchu, vawiin thleng hian Dalit Christian leh Dalit Muslim-te chu Scheduled Caste anla ni ve thei ta lo a ni. Hetianga sakhua avanga inthliarna tha lo tak awm hi duh lovin, National Council of Churches-in-India chuan kum tinin August ni 10-ah National Protest Day an hmang thin a ni.