Aizawl May 17, 2024 : Vawiin khan Mizo Hnam Run-ah chhung inkhawm neih a ni a. Hun hnihna political session-ah MNF General Headquarters PAC member K. Riachho, IAS (Rtd.) chuan Bengal Eastern Frontier Regulation, 1873 chungchang te, India leh MNF inremna, CAB leh UCC chungchang te a sawi.

K. Riachho chuan, "Zofate hian Pathian zawn chhuah ram kan inti fo thin a, he dan hi British in kum 1873-ah kan tana dan min lo siamsak daih tawh a ni a, kan ram leh hnam himna atan vawiin thlengin a pawimawh a, he dan hi awm lo ta se tun dinhmun hi kan thleng lo ang. He dan hi Assam District thenkhat, Chittagong hills tracts, Naga Hills-te tan pawh siam a ni a. Hnam tlem zawkte chimral lohna tura min siam a ni," a ti.

"Kum 1930, August ni 28- ah he order hi keini pawhin kan hman ve theihna tura siam a ni a. He dan hian tlawh chhan mumal tak neiin, Government of India Act, 1870 tlawhchhanin Lushai Hills a hmang ve turin a siam a. Keini pawh hian kum 1950, January ni 26 atang khan Indian constitution hi kan hmang ve tan chauh a ni," a ti bawk.

India leh MNF inremna chungchang saiin MNF PAC member chuan, "Kum 1986-ah state kan nih theihna turin UT laia dan kan hman chhunzawm theihna tur siam a ni a. India leh MNF inremna dan kha a hluin ILP kan nei chhunzawm a, MOU-ah Mizoram sawrkar rawn hmasa lova ILP tihdanglam theih lohte kha a ropui takzet a ni, a ti. He dan hi India ramah a hman tlak loh titu tam tak an awm a, keini tan chuan a hluin kan inhumhimna a ni a, keini chuan khawi hmunah pawh in leh lo kan nei thiang a, hetiang dan hi neilo ta i la, kan sumdawnna lian zawng zawng hi kan thenawm state te angin vai hovin min neihsak vek tawh ang," a ti bawk.

CAB chungchang pawh sawiin, "Parliament-ah putluh anih khan India mipui pahnihin an duh loh laiin, pakhat chauhin an duh a. India mipui kan tam tawh teh reng nen, kan pun belh zelna tur a ni a, inthliar hranna nasa tak a ni. Keini pawhin NGO zawng zawng nen kan do a, Zoramthanga sawrkar khan Assembly-ah huaisen takin a dodal a, hemi dan hian min huam ta lo a ni," a ti.

Uniform Civil Code chungchang pawh Mizoram tan a that loh thu K. Riachho chuan a sawi a. "A sawi mawituten inthliarhranna a awm loh thu leh inpumkhatna a ni a, hmeichhia leh mipa intluk tlanna a awm theihna tur a ni an ti a. India rama sakhaw kulmuk tam takin an remti lo a. A duh lo pawlin sakhaw zalenna leh hnam tenau zawkte nen inpumkhatna a kalh an ti a. An sir tluk ta rih a, a duh chuan hman a, a duh lo chuan hman loh an ti a. Uttarakhand-ah chuan an pass tawh a, BJP hi a sawrkar leh anih chuan an hmang vek lo ang tih a sawi theih loh a ni," a ti bawk.