ZALEN January 9, 2025 : India rama sorkar damdawi in tha bik thlan zingah District Hospital pahnih – Siaha District Hospital leh Lawngtlai District Hospital leh Primary Health Centre pahnih – East Lungdar PHC leh Phuaibuang PHC te an tel.

National Health Mission, Health & Family Welfare Department atanga thu dawn danin, India rama sawrkar damdawi in tha bik tehna, National Quality Assurance Standards (NQAS)-ah Siaha District Hospital, East Lungdar PHC leh Phuaibuang PHC te chu an tling a ni. A hmain Aibawk PHC, Thingsulthliah PHC, Civil Hospital Aizawl, Civil Hospital Lunglei, Champhai District Hospital, ITI UPHC, Chawlhhmun UPHC, Haulawng PHC leh Sialhawk PHC te an lo tling tawh bawk.

NQAS-a tling tur hian state level leh national level aṭangin tehna hrang hrang paltlang a ngai a; tehnaah hian Siaha District Hospital-in 92.53% hmuin, Lawngtlai District Hospital hian 88.08% an hmu a, East Lungdar PHC-in 89.29% an hmu a, Phuaibuang PHC-in 84.23% an hmu thung.

Siaha District Hospital hian damdawi in puma NQAS an hmuh bakah hian India rama nau neihna hmun tha bik leh inzaina hmun tha bik tehna LaQshya certificate an hmu tel a, LaQshya bikah hian Platinum Certificate an dawng pha a ni. Hemi bakah hian naupang damlo enkawlna hmun tha bik tehna, MusQan-ah an tling bawk a ni. Lawngtlai District Hospital pawh hian LaQshya certificate an hmu tel bawk.

NHM, Mizoram chuan, India rama damdawi-in tha bik thlan chhuah zingah Mizorama damdawi in an awm belh zel chu Department leh Mizoram tan méllung pawimawh a nih thu leh thawktu zawng zawng te thawhrimna leh taimakna chhuanawm an tih thu an sawi bawk.