Aizawl April 8, 2024 : Vawiin khan Lok Sabha inthlan lo awm tura Indian National Congress Candidate Lalbiakzama chuan Champhai tlangdung tlawhin Campaign a nei mek a. Hmun hrang hrangah thusawina hun a nei a, Central lamah chuan BJP paih duhna a lian hle niin a sawi.

INC Candidate Lalbiakzama chuan, "Kum 2014 atanga India ramah BJP ten Sorkarna an chan atang khan khawvel mit hmuhah India hi a tlahniam chak hle a. Tunhnaia tehna hrang hrang an siamah pawh a tla hniam chak hle a ni. Politics-a an khingpuite man khawmin Jail-a an tantirte hian khawvel a barakhaih a.Heng thil avang hian BJP nilo te an tanrual that phah ve thung a. India Bloc a tel lo party te pawh India bloc ah an rawn tel phah mek a. BJP paih an duhna a lian hle a ni, a ti.

Lalbiakzama chuan, "BJP chakna ber chu a phena RSS, Bajrang Dal leh VHP te an nih thu sawiin BJP Sorkar hian RSS, Bajrang Dal leh VHP te thu thua kalin tunah hian Kristian leh sakhaw tenau te tan a hnawk thei ang berin an che a. Hindutva buaipui bera neitu, Kristian Missionary ten hnawk an tih em em BJP te do tur hian Pathian leh mipui zara MP-a thlantlin ka nih chuan theihtawp ka chhuah dawn a. Mipuite khawngaihna pawh ka ngen nghal a ni," a ti.

INC Candidate chuan MNF leh ZPM chungchang sawiin, "MNF lam chuan an thutna tur an tichiang tawh. BJP lama an thut tur thu an sawi. ZPM ten vawiin ni thlengin an thutna tur lam an la sawi chiang duh lova. Sawi chian duh lohna chhan an nei a ni. Nimahsela, Zoram mipuiten Central lama ZPM thawhpui tura rin an nei thup a, an ring sualin ka ring lo. An duhna lamah chuan kal rawh se. Central lamah duhthlan tur pahnih chiah a awm. Pakhat chu Kristiante tana hnawksak taka che thin BJP Party an ni a. Pakhat leh chu Kristiante thlavang hauh thin Congress Party a ni. Congress lamah kal an tum loh chuan an kalna tur lam hi a chiang thawkhat viauin ka hria a ni," a ti.