Mizoram chuan a vawi khat nan player pathum leh pathum hmanga India ram puma state-te basketball-a an inelnaah hmeichhia leh mipa team a tir dawn.

Basketball Federation of India (BFI)-in a buatsaih thin, 3X3 Senior Nationals Championship hi a vawi thumna tur niin Mizoram Basketball Association (MBBA) chuan hmeichhia leh mipa team a tir ve dawn a ni.

Kumin inelna hi Chennai, Tamil Nadu-ah September 22-24 chhung hian Jawaharlal Nehru Indoor Stadium-a khelh tur a ni a, a ti tha zual state pasarih chu October 25 leh November 9 chhunga 37th National Games, Goa-a neih turah an tling nghal dawn a ni.

3X3 National Basketball Championship hi kum 2013 khan a vawi khat nan BFI hian a buatsaih a; mahse, a hnuah vawi khat chauh la khelh zui niin mipaah Tamil Nadu chu champion lai niin hmeichhiaah Railways an ni ve thung.

BFI-in an official Instagram page-a an tar lan dan chuan kuminah hian state 25 atangin team 50 (hmeichhia leh mipa) an tel dawn a, player pawh 200 chuang zet an inlan dawn a ni.

Mizoram hi India ramah basketball-a hriat hlawh tak a ni a, August 3-9 chhunga Puducherry-a BFI-in 48th Sub Junior National Basketball  Championship a buatsaihah pawh mipa team chu an tumpui zawng zawng hneh vekin an champion a ni.

3rd 3x3 Senior National Championship Mizoram team:

HMEICHHIA:
Chawnghmingliangi, Mission Vengthlang
Lalramropuii, Bawngkawn
Saidingpuii Sailo, Reiek
ST Lalchhanhimi, Nursery Veng

MIPA:
Lalrina Renthlei, Tuikhuahtlang
Lalnunpuia Renthlei, Bungkawn
Michael Liansanga, Serchhip
Vanlalthazuala, Bungkawn