Aizawl August 6, 2023 : MPCC Vigilance Cell chuan Lengpui Airport enkawl chungchang zirchianga rawtna siam tura Mizoram sawrkarin a din Working Committee chuan Chief Minister hnenah rawtna an thlenah Lengpui Airport tih changtlun hna thawk tur leh enkawl turin Indian Airforce chauh beisei tur an hmu niin report a awm niin lang an ti a, Indian Airforce kuta hlan hi Congress chuan tha an ti lo.

MPCC Vigilance Cell Chiarman Lalnunmawia Chuaungo chuan Lengpui Airport hi Aiport Authority of India (AAI) kuta hlan chu thil tha ber nia a hriat thu a sawi a, official level-a dawrna chu AAI lam hian an pawm lo a nih pawhin a awm a, mahse, Political level-ah democracy kan nihna angin theih loh tur a awm lo a ti.

Chuaungo-a chuan AAI chu Mizoram Chief Secretary a nihlai atang tawhin tum tam tak a dawr tawh thin tih a sawi a, "AAI hian Lengpui Airport hi lak an chak vak lo a, a chhan pawh hun engemaw chen chawibelha an kal dawn avangin an tan hloha kal reng chu thil chakawm a ni lo reng a, mahse, kan tana a that zawk miau avangin a lak tir dan kawng hi ngaihtuah a ngai ni," a ti.

MPCC Sr. Vice President chuan Indian Airforce hnena hlan hi hun lo la kal zel tura atan a tha tawk lo niin a sawi a, "Anni hnena kan hlan dawn a nih chuan an hmun tur zau tak pek an ngai dawn a ni," a ti. Lengpui Airport chu Mizoram atan chuan commercial airport atan a that ber a rinthu a sawi a, amaherawhchu International flight te tum tir tum a, Cargo flight liante tum tir dawn a nih chuan a tlan kawng erawh tih sei a ngaih tur thu a sawi bawk.