Chanmari, Lunglei tlangval, Jeho Himnakulhpuingheta chu Indian University Table Tennis (Men) Team-a tel tura thlan a ni a, India-a university/college zirlai maktaduai tam tak aiawhin a inlan dawn a. A kalkawng zawh erawh a thui hle.

Jeho-a hi July 28 leh August 8 inkara Chengdu, China-a World University Games khelh turah a tel dawn a, a hmaa a kalkawng lo zawh tawh chu thuhran ni sela, Indian zirlaite aiawha tel tura a kawng hi a thui khawp mai.

Kawng hautak
A tha zawng a ni emaw, a chhe zawng emaw pawh ni sela, Mizoram huap ringawtah pawh ‘ber’ nih hi thil harsa a ni a. Mizoram ai chuan India ram pum huapa thlan chhuah bik nih phei chu thil harsa a ni ang tih a chiang.

Chu kawng hautak leh khirh tak chu Mizo tlangval, Jeho-a hian zawh chhuakin India rama university zirlai zawng zawngte aiawha table tennis khel tura hmeichhia leh mipa panga ve ve chauh thlan zingah a tel.

Team-a tel pha tura thlan tur neihna, selection trial-a inlan tura koh phak ringawt pawh a pui khawp mai a, player 20 emaw vel chauh an tel phak.

Heng player-te hi All India University Games leh Khelo India University Games-a quarterfinal lut pha chin atanga thlan an ni a. June 11-13 inkar khan Chandigarh University-ah trial an nei a, hetah hian Mizo tlangval hi pathumna niin a titha panga thlan chhuah zingah a tel a. Association of Indian Universities (AIU) chuan China-a Indian zirlaite aiawh turin a thlang ta a ni.

Jeho-a hi Khelo India University Games 2022-ah khan Mizoram University (MZU) aiawha telin bronze medal a la a, hei vang hian selection trial-a tel tur hian koh a ni ve chauh a ni.

Mizo zinga hmasa ber
Saphovin ‘teenage’ an tih pawh la kal pel lo, December thlaa kum 20 tling tur, Jeho-a hi World University Games-a Mizo tel hmasa ber tur a ni a, games-ah hian infiamna chi hrang tam tak a awm a, hengah hian table tennis a ni emaw, ni lo emaw, Mizo tel phak an la awm ngai lo va, Jeho-a hming a lang ta.

India ram puma zirlaite aiawhtu tur chuan a hmabaka inelna sang tak hmachhawn tur hian a inpeih tih a sawi a, “China a ni dawn a, table tennis chu kan chhak lam ram mite thiam chi tak a ni a, a hautakin a harsa (tough) dawn tih chu a chiang,” a ti a. “Mahse, tawnhriat (experience) tha tak neihna a ni dawn a, hma lam zel atan a tangkai dawn,” a ti.

Jeho-a hi Croatia-a table tennis league division sang ber, Croatia Super League-ah pawh September leh November, 2022 khan Varazdin, Croatia-ah a khel a, a club a champion-pui nghe nghe a. Mizo zinga ram dang league-a khel thei hmasa ber leh awm chhun a ni mek bawk.

La inzir reng
Govt. Hrangbana College-a BA 5th semester zirlai, Mission Venga khawsa mek, Jeho-a hian India aiawh pawhin kum bithliah inelna hrang hrangah lawmman a lo dawng tawh a, heti chung hian a la inzir reng a, a aia tha nih zel a la tum.

Tunah hian Pinnacle Table Tennis Academy, Gurgoan-ah a awm mek a, tunah hian Aizawlah Mizoram Table Tennis Association (MTTA)-in Season Opening Tournament a buatsaih mekah a inlan a, a khelh zawh veleh, Nilaini hian a inzirna hmun hi a pan lehnghal ang.

Pinnacle-a a awm hma pawh hian Petroleum Sports Promotion Board-ah kum 2018 atang khan a lo awm reng tawh a, hetih hun lai hian kum bithliah inelna hrang hrangah lawmman a lo dawng tawh a. Kum 2018 khan Pinnacle-ah a insawn a ni.

Chengdu-a World University Games khel tur hian engtikah nge inbuatsaihna an kalpui dawn tih a la hre lo va. A tel dawn tih hriattirna chauh a la dawng a, an koh huna che chhuak turin a inpeih reng tih a sawi.