'Indiana Jones 5' chu chan mek ni mah se a changtupa ber Harrison Ford a inhliam avangin an chawlh san lailawk a ngai dawn a, tlangzarh hun pawh an sawn hla dawn niin an tarlang. 

American actor Harrison Ford hi shooting an neihna lamah a inhliam a, a dar a tina. Zai a ngaih dawn avangin a lo berah thla khat tal a chawlh a ngai dawn a, chu aia rei pawh a chawlh a ngai mai thei bawk. 

Harrison Ford hi kum 78 mi lai a nih ve tawh bawk avangin a hliam hi a dam hun tua an beiseiah a dam hman ang em hriat a ni lo a, Indiana Jones fan ten dawhthei taka an nghah a ngai dawn a ni. 

Tun thlenga mi tam tak en chak leh an lung tilengtu la ni reng 'Indiana Jones' hi American film director Steven Spielberg chuan hun rei tak chhung a lo buaipui tawh a, tun a mi erawh hi chu James Mangold kut chhuak a ni ve thung dawn. 

A changtu zingah pawh Harrison Ford la tel tho mah se hmel thar an awm dawn a, British actress Phoebe Waller-Bridge bakah, German actor Thomas Kretschmann leh Danish actor Mads Mikkelsen te pawh an inlan dawn a ni. 

Indiana Jones 5 hi ruahman dan chuan nakkum July-a tlangzarh tur a ni a, a hun takah an release thei dawn em tih erawh hunin a la hril dawn a ni.