Indo tawp hnuah Gaza-ah tanpuina thawn a lut tan

Admin - May 23, 2021

UN agency for Palestinian refugees (Unwra) chuan an ngaih pawimawh hmasak chu an chenna in chhuahsante chhui chhuahah an awmna ngaia awmtir leh a nih thu an sawi a, hemi atan hian $ maktaduai 38 tal mamawh a nih thu an sawi | | Gaza-a housing ministry chuan chenna in 1,800 chuang chu mihring chenna atana luah tlak loh a nih thu a sawi a, in 1,000 dang pawh chhia, luah tlak ni si an awm tih a sawi | | International Committee of Red Cross (ICRC)-a Middle East director Fabrizio Carboni chuan, “Chawlhkar hnih pawh tling lo indona hnuhma chhiate hi siam tha tur chuan kum tam tak, kum 10 hnua siam that theih loh tur pawh a awm,” tiin a sawi |

Israel leh Palestinian helhovin inkahhai an puan hnuah Gaza-a tanpuina thil thawn luh hmasak ber chu a thleng ta.

Inkahna a tawp hnuah hian Palestinian sang chuang chu an in chhe rem rumah an haw hlawm a, thuneitute chuan siam tha leh tur chuan kum tam a ngaih an ring.

World Health Organization (WHO) chuan ram dangte chu hliam tuarte enkawlna tur hmun din turin a ngen nghal.

Ni 11 an indo chhung hian mi 250 chuang an thi a, a tam zawk hi Gaza lamah an ni a. Indonaah hian Israel leh Hamas hian hnehtuah an inchhal ve ve.

Israel chhim lam, helhovin an kah nasatna laia chengte pawhin inkahhai tawp hi an lawm a; mahse, an indo tawpna chuan rei a daih loh an ring.

Tanpuitu pawl (aid agency) hrang hrang, United Nations hnuaia mite pawh huamin, tanpuina thil phurtute chuan Gaza hi an lut a. Israel-in Kerem Shalom crossing a hawn hnua tanpuina thawn luh hmasak zingah hian damdawi, ei tur leh tuialhthei a tel.

Gaza-ah hian mi 1,00,000 chuangin an chenna in chhuahsanin an tlanchhia a, heng lai hmun hi Hamas hel pawl awp niin mi 8,00,000 dawnin tui herh haw mai tur an nei rih lo niin Unicef chuan a sawi.

Palestinian thuneitute chuan Covid-19 avanga an harsatna tawh nen, an mamawh thil chu dollar maktaduai tel senna tur a nih thu an sawi.

WHO thupuangtu, Margaret Harris chuan damdawi leh a thawktute an mamawh tak zet thu a sawi a. Gaza-a damdawi inte chu hliam tuar sang tel tan indaih ngaihna a awm lo niin a sawi.

Gaza hi Israeli leh Egyptian chuan mihring leh bungraw luhtir a phal vak lo va. Ram pahnih hian Hamas-te hmanraw chawk luhna kawng niin an ngai a ni.

Share now