Gaza Strip-ah nimin khan mi 10 an thih belh leh an zinga pasarih hi Israeli indo thlawhnain Gaza City khawthlang lama raltlan awmna (refugee camp) a kahnaa thite an ni tih BBC chuan a tar lang.

He a kahnaah hian naute thla nga mi chauh a dam chhuak a, a nu ruang bulah, in chim karah chhar a ni a. Mi eng emaw zat an chin hriat lohvin an awm bawk.

Kum 36 mi, Akram Farouq chuan Gaza-a an chenna in chu a chhungte nen an chhuahsan a. An \henawma miin Israeli officer-in phone-a biain  an awmna in chu an kap dawn tih a hrilh tih a sawi vanga chhuak an nih thu Reuters news agency chuan a tar lang.
“Thil puak avangin zankhuain kan mu lo va, tunah chuan khawlaiah ka nupui leh ka fate nen, awmna tur hre lovin kan awm mek a ni,” a ti.

Thawhtanni atanga inkahna thleng avang hian Gaza-a Palestinian 10,000 chuangin an chenna in an chhuahsan tawh niin UN chuan a sawi.

Israeli thuneitute chuan Zirtawpni zan khan Gaza a\angin rocket 200 chuanga kah an nih thu an sawi a. Ashdod, Beersheba leh Sderot-a chenna inte kah fuh a nih thu an sawi bawk.

Beersheba-ah hian mi 19-in hliam tuarin damdawi inah dah luh an ni a, pathum chu an ruh a tliak niin The Times of Israel chuan a tar lang.

Israel hian thlawhna atang bakah lei a\anga Gaza beih chu a tum a nih thu a sawi tawh a; mahse, bei turin thutlukna a la siam lo thung.