Sulawesi island, Indonesia-a nickel plant-a thil puak na takah thawktu mi 13 vel an thi a, mi dang thahnem takin hliam an tuar a, an zinga thenkhat chu an dinhmun a tha lo hle.

Thi zinga pariat hi Indonesian an ni a, panga chu Chinese an ni ve thung a. Plant hi Chinese puihnaa kalpui a ni.

Thil siam that hna thawhnaah thil tuiril kai dung tak meiin manin a bula oxygen tank chu a tipuak ta niin chhui hna thawh tawh china an hriat dan a ni.

Indonesia hi khawvela nickel thar chhuak hnem ber a ni a, electric car battery leh stainless steel-ah hman thin a ni.

A puahna hmasa ber bul lawka oxygen tank dangte pawh a tipuak zui niin Indonesia Morowali Industrial Park (IMIP) thupuangtu chuan a sawi.

Kang hi darkar eng emaw zat hnuah thelh mih a ni.

IMIP hi nickel lam bik buaitutu enterprise a ni a, Chinese company ta niin stainless steel leh carbon steel an siam chhuak thin.

Company chuan hliam tuar zawng zawngte enkawlna an tum dawn tih an sawi bawk.

“An hmai a kang a, an thawmhnaw pawh a kang nasa hle,” tiin thil puak bul hnaia awm thawktu pakhat chuan French news agency AFP a hrilh.

Morowali district head nihna chelh lailawktu, Rachmansyah Ismail chuan hliam tuar zinga a zahve dawn hi ram dang mi an nih thu tual chhung chanchinbu mite hnenah a sawi a, an zinga 17 chu inhliam nasa an nih thu a sawi.

China hian man to lo zawka electric vehicle industry a kalpui theih nan Indonesia-a nickel plant-ah te sum tam tak a thawh.

Nickel hi tunah chuan ram leilung hausa tak, Indonesia-a an eibar dinhmun chawi kangtu pawimawh tak a ni ta mek a ni.

Kum 2020-a an sorkarin sawngbawl lohte ram danga thawn chhuah a khap hnuah ram dangin dollar tluklehdingawn tel an thawh a, heta tang hian an ram hmun kilkhawr zawka a laih chhuahna hmunte thar chhuah chu a pung chak nghal hle a ni.

Thar chhuah a pun mek lai hian chhiatna rapthlak tak tak erawh a thleng zui nasa hle thung.

Kumin kum tir lamah khan Chinese leh Indonesian thawktu pakhat ve ve chu nickle plant hmun khata thawktute lungawi lohna lantira tharum thawhna thlengah thah an ni.

Thla tam la liam lovah khan he plant-ah vek hian kangmei chhuakin thawktu pakhat a thi a, parukin hliam an tuar bawk.

Heng thil thleng thin avang hian thawktute himna ngaihtuah that a ngai a, Chinese company-te pawh an sum thawhnaah mi himna leh thawh dan kalhmang him zawk kalpui turin an ti nasa.