DOWNLOAD OUR APP

Read latest news on your phone
play-store app-store
app-store
ad
Indopui - Corona dona
titi ZALEN
May 09, 2020
  • H.Thangluaia
  • Indopui II-na khan khawvel a deng chhuak a, kei pawhin chiang takin ka hre ve tawh. Kan khua thingtlang khaw tê tak tê-ah pawh sipai an awma rawsawt (ration) pawh sipaiho tan an thlak a. Mahse, ram tam tak chuan a thawm an hria a, an tuar ve lo. Tuna kan indopui, hri zet erawh hi chuan khawvel a deng chhuak a, kan buaipui dan leh mi a tihbuai dan em em hi chu mak tak a ni. Ka tunu school kaltir pawhin a hre chiang khawp, a hlauhawmzia pawh a hria a, mobile-ah a sawi a, kan chhungkaw whatsapp group-ah a thehdarh hial.
  • Khawvel rambung chu sawi loh Mizoram, ram zau lo takah hmelma sipai pakhat a rawn lut a, kan phek buai a, a dang a rawn luhbelh kan hlau a, sorkar leh khawtlangin kan phek buaipui a nih hi. He kan do HRI hian mi dang kai turin a sawm a, sorkar leh ram hruaitute, khawtlang hotuten a sawm thlu ang tih hlauvin theih tawp chhuahin min veng chu a nih hi. He kan indopui hian khawvel a nghawng dan, a hlauhawmzia, a hnathawh dan, a lo chhuah dan emaw a chanchin emaw sawi ka tum lo. Kan hria. A laka inven dan tur hotute thu pawh kan hre hneh tawh sawi ka tum lo, kan hria. Kan hriat chu eng nge? INKHARKHIP: Lockdown leh awm dan tur, khawsak dan tur, thuneitute duan hi a ni.
  • Sorkarin tih loh tur, tih turte min hrilh a, kan hria ka tih tawh kha. Mahse, sorkarin tun ang reng hian inkharkhip a ti reng thei dawn lo. Sorkar tan tih tur a tam, a ram sum leh pai (economy) ngaihtuah a ngai, a ram inrelbawlna, ei leh in tur lam, lo neihna lamte a ngaihtuah a ngai, thil tam tak hna a ngah mai. He hri leng chungchang i hriat tur tul leh i inven dan turte a hrilh hre tawh che. Sorkar leh khawtlang hruaitu tlawmngaiten darkar sawmhnih pali-ni khat - kum khat - ni 365 a veng reng thei lo vang che. I khawsakna tur a pe thei lo che tih i hria em? Eng nge i tih tur le? Ni sawmli sorkarin min veng tawh. Inkharkhip an han thlahdul dek dek a, sipai pakhat rawn lut hmasa kan damdawi lam mi thiamten an han tihlum thei hram a, kan lawm hle, a lawmawm e. Tichuan, i thla a muang a, zalen ta riauah i inngai mai em ni? Sipai dang, ram dang ramri bulah lo luhna remchang zawngin an vei sek a nih hi. Kan Mizopa tlawmngaite an hah tawh asin. Kan thlang maiah Tripura state Kanhmun lamah an rawn lut tawh. Bangladesh-ah phei chuan a pung nasa tawh mai. Kan chhak mai, Myanmar-ah pawh phung velh ang maiin an pung tual tual. Khawvelah phei chuan an pung - ram hausa, kan tluk loh sapho pawhin an ngam lo, a ni telin a sang telin an thi duak duak ni tin mai a nih khu. Keini ram ve tehlul, ram rethei, sorkar hnathawk hlawh tur pawh pe thei tawk tawk, vai buhfai ringte phei hi chu maw kan indopui sipai hi 2/3 lo lut mai se chu kan châk lo vang. Keini ang kum tam upa tan phei chuan karei, karei ka dawn ngam lo.
  • Chuvangin, sorkarin a veng reng dawn lo che kan tih tawh kha; tichuan, i hma lam hun, nang leh i chhungte hun lo awm zel tur chu i kutah a awm e. Engtin nge i tih dawn ngunthlukin ngaihtuah a ngai. Inkharkhip an han thlahdul hlek a, i tih sual leh i tih loh sual tam tak a awm nghal pang mai. May 17, 2020 a lo ral ang a, engtin nge ni ta ang?
  • Inkharkhip a ni a, awm awl tawpin i mu reng mai nge zing dar sawmah pawh i la mu? Pa pakhatin a fate leh tute an mu rei an tho duh ngai lo va, “Tho teh u, tho teh u, bus station-ah ka va kal a, thingtlang lam kal turte chu an kal chhuak vek tawh, in delhhlum sa in ei dawn em ni? Delhhlum sa lo chu sa a vâng ang a, in chiar leh ang e,” a ti a. Kan naupan laiin kan khaw pa, taima tak hian, tlai chaw ei laiin a fapa pakhat (a hming sawi lo mai ang) chu, “Nang, naktuk zingah hma takin nungcha thawhrualin tho la, kan tai (buh) a hmin dawn tawh a, vaki va veng rawh,” a ti a. Zing chaw ei laiin a vaki ven chanchin a’n zawh leh chuan, a sawi angin a veng lo tih a hre chhuak a, a chaw ei lai a tho thut a, a riahna ina a fapa mutbu (puanthuah) a han la lawk a, in hnuai dap ro tha a la a, a puanthuah chu a hal hem hem mai a, an nuin a chuh tha ngam si lo, a kang bâng ut remrum chu a chuh thla hram thei choh a ni. A mu reii, a mu reia nihte hi tha kan ti tlang em?
  • Thuawihna, thu zawm, sorkarin tih loh tur, tih tur a tihte kha - mahni taksa, kan theih ang anga vawn that, zing thawh hma, insawizawi, pu ber ta ang neih a ngai chuang lo, pawn chhuak lova tih theih a tam. Kan neih ang tawk a, ei leh bar tih that, in vawn thianghlim, in leh a vel, bungbel, puipunna tel loh nen, nun khawhar a nih pawhin tih hram hram. Hun awl hman that nan lehkhabu chhiar tam, kan thurin bu a bik taka chhiar. Kan rin Pathian hnenah kan nun mamawh dil a, tawngtaina hun hman tam. Kan rilruah dik taka ngaihtuah a, khawvel kan hun kal tate chhui nawna keimahnia sual sim turte sim a, Pathian hnena thupha chawina hun hman; Chu chu Pathian han biak pawh leh theihna hun siamtu a ni thei. Hetiang deuh hian kan tawngtai thei em? “Aw Lalpa, kan Pathian ropui leh hlauhawm, lei leh van siamtu ropui, i hmangaiha i zawn chhuah i tlansa Zofate hian i chungah thil nasa tak kan tisual thin. I hnenah sual thupha kan rawn chawi e, khawngaih takin i chhiahhlawh hi min lo ngaithla ang che. I ram min pek mawi leh nuam tak Zofate i pek, kan pi leh pute avanga kan rochunah hian ni tha, hun tha min siamsak a, min pe zel turin min thuam thar zel la, chumi ti thei turin chakna min pe bawk ang che, he hri tihbaiawm tak kan vel a châm mek hmang hian i ropuizia, i makzia, i thiltihtheihzia leh Pathian tak i nih bikzia khawvel mi zawng zawng hi hriattir zel la, keini Zofate a tharin min hriat chhuahtir leh la, Nang leh Nang khawvelah rawn inpuang nawn leh ta che. Tichuan, khawvel hian mak tiin i ropuizia, makzia, chungnun bikzia a lo hre chhuak ang a, i ram ropui tak a lo ni ang. Lalpa ropui, hnam anga kan tihsual emaw, kan tih tur tih loh sual emaw a awm chuan Isua Krista hmingin min ngaidam ang che. Amen,” tiin he thu ziak mawl tak chhiartu zawng zawngte kan biak Pathian hnenah tih tak zeta kunin kan tawngtaina chhangtu Pathian a ni tih hre rengin kan inhlan thei em?

Latest News & Chhiar Hlawh