November 15, 2022; Mizoram Industry Owner Association (MIOA) hruaitute chuan, hnam dang company Ispat te kum 99 chhung atan Mizoram sawrkarin ram a pek theih laiin, leilung fate Industrial allotment erawh kum 10 chhung chauh ram pek theih an ni tih an sawi a, "Industry ngai pawimawh sawrkar kan la nei lo," an ti.

Vawiin chawhnu dar 1:30 khan Aizawl press club ah thuthar thehdarhtute kawmin, "Industry an din ve te department lamin lian tawk lo min tih sak zel avangin ram leilung fate Industrial Allotment kum 10 chhung chauh ram min pe thei an ti a, hengte avang hian kan khawl leh khawl In ten hlutna an nei thei lo a ni," an ti.

Hetihlai hian hnam dang company Ispat te chu kum 99 chhung ram pek an nih avangin an khawl In (factory building) leh an khawl (machinery) te chuan hlutna an nei bik niin an sawi.

Ram leilung fa ten sawrkar ah NOC an dil ngawih ngawih hnu pawha pek theih an nih loh laiin, ram dang mi Ispat company te hnenah chuan an In leh khawl mortgage thei tur a NOC an la pe zui leh zel te chu hriatthiam har an ti hle tih an tarlang bawk.

An khawl (plant & machinery) leh an khawl In (factory building) ten hlutna nei ve se property tax pek na an ti lo tih MIOA hruaitute chuan sawiin, "Property tax pek dawn ve leh in ta a ni e, min ti ringawt hi hriatthiam har kan ti, Industry neitute hi sawrkar hian sum siam nan min hmang em ni, tih hi kan zawhna a ni," an ti bawk. 

Hengte avang hian tun dinhmunah chuan mi ram luah hawh an nih avangin property tax pek rih loh phawt nise tiin thutlukna an siam tih an sawi.