Mirabai Chanu chu Indian weightlifter zinga Olympic medal dawng thei pahnihna niin Tokyo Olympic a Indian medal la thei zinga mi a ni.

 Mirabai Chanu hian rit chawiah a pum puiah kg 202 chawiin snatch-ah kg 87 leh clean and jerk-ah kg 115 chawiin silver medal ala. A medal lak chung changah Chanu chuan, "Ka suangtuah thin chu a takin ka tawng ve ta. He ka hlawhtlinna hi ka ram tan ka hlan a, ka zinkawng a hlawhtlinna ka chan theih nan India mi billion chuang ten min tawngtai pui vangin ka lawm a, ka chhungkaw chungah ka lawm hle bawk. A bik takin ka tan a engkim huam leh keimaha rinna nghat tlattu ka nu chungah ka lawm em em a ni," a ti  

Thingtlang naupang chak thing fawm

Kum 14 liam ta khan Mirabai Chanu chu kum 12 mi lek niin Manipur khawpui Imphal atanga km 20 leka hla thingtlang khaw te tak te Nongpok Kakching-ah an chhungkaw eirawnbawlna tur thing fawnin a u te nen an chhuak thin a.

Tuk khat chu Mirabai leh a u kum 16 mi Saikhom Sanatomba Meitei chuan tlangah thingtuah an fawm a, an pahnih a thing fawm chu an tel khawm a, a u Sanatomba chuan put mai a han tum a, a chawi zo ta awzawng lo mai. Tichuan, hmeichhe naupang kum 12 mi lek Mira-i chuan awlsam angreng takin thing intel chu a la kang a, in thlengin a chhip ta mai a. An thingtuah lakna hi an in atanga km 2 laia hla a ni.

Kum 5-6 bawr a nih khan Mirabai hian tui bucket khat te chu a chhip zo lah lah tawh a, chutiang khawpa hmeichhe pian danglam leh chak bik chu a ni. 

Retheihna ngam loh naupang 
    A pa Saikhom Kriti Meitei hi state Public Works Department, Imphal-ah construction worker hna a thawk thin a, a nu Saikhom Tombi Devi chuan an khuaah thingpui dawr lianlo te a nei thung. Mirabai te hi unau hi paruk lai niin a naupang ber a ni a, a pa hlawh tam lo tak chu an kham khawp ngawr ngawr a ni.   

A u Sanatomba chuan, “A kawng zawh puitlin a pui turin sum lamah harsatna namenlo kan tawk a, ka nu leh pa hian harsa tak chung pawhin hmalam a pan theih nan an support hram hram thin a, a chhelna leh tumruhna vengin tun dinhmun hi a thleng thei a ni," a ti. 

Kum 12 mi lek a nihin Imphal-a Sports Authority of India (SAI) centre a tlawh a, Khuman Lampak Stadium a tlawh tum hian a tuina leh kawng zawh tur pawh ala hre chuang lo. archery (thal kah) an training te thlir kualin a nunah danglamna thlen tur khawp thil tawn a nei hran lo. Tum khat chu Manipur hmeichhe rit chawi chak (weightlifter) Kunjarani Devi video clip pakhat hi a hmu hlauh a, a ni hi World Championship-a tum 7 zet silver medal lo dawng tawh leh Commonwealth Games gold medalist kha a ni a, chu clip tawite chuan a ngaihtuahna thlak danglam sakin Mirabai-i chuan a hma huna a tih tur chu a chhar chhuak ve ta. 

Mahse, an khuaah weightlifting zirna hmanrua a awm tha lo, chuti chungin coach Anita Chanu enkawlna hnuaiah a inzir ve sauh sauh a, nitinin an chhevel tlangah chuan km 40 km chuang te kalin a training thin. 2006 chuan coaching academy pangai hnuaiah Mirabai pawh chu a lut ve ta a. 

Naupang tumruh chu
    A rit chawi training na hmun tur chu hmun hla tak a nih vangin a chhungte chuan an ngaihtuah hle a, zir mai turin an duh a. A nu Tombi Devi chuan, “Harsatna lian ber chu amah maia training tura Imphal-a kal tir kha a ni. Imphal lama inzir chu a tan thil harsa tak a nih tur thu kan hrilh pawhin a rilru sawh sawn a tum lo. Nitin km 40 a kal ziah a ngai a, a changin truck-in a kal thin a, a vanneih chang chuan tuk-tuk (auto rikshaw) leh cycle ten a kal a, a kawng zawhah hian inchhira beidawn a nei ngai lo," a ti.

Kum hnih hnuah chuan national camp lamah a lut ve ta a. Mirabai chuan kum 2011 khan a national medal hmasa bera la a, reilote hnuah, national team-a koh niin a idol Kunjarani Devi hnuaiah a inzir chho thei ta bawk. 2014 Commonwealth Games-ah silver medal lain khawvel hriatah a inpho lang tan.

Hlawhtlinna leh chawimawina
    Tokyo Olympic silver medal bakah hian 2017 khan World Chapionship, Anaheim-ah gold medal a la a, nikum khan Tashkent, Asian Championship-ah bronze lain 2014 leh 2018 Commonwealth Games-ah silver leh gold medal alo awrh haw ve tawh bawk. Infiamna lama a hmingthat avangin India ramin civil chawimawina sang a neih palina Padma Shri chu 2018 khan hlan a ni a, hemi kum vek hian India infiammi te tana chawimawina sang ber Rajiv Gandhi Khel Ratna chawimawina hlan a ni bawk.

A pawisa lakluh
    2017-a World Weight- lifting Championship-a gold medal a lak tum khan nuai 20 chu Manipur sorkar chuan a pe a. Manipur sorkar vek hian tun Olympic-a a qualify vangin nuai 10 pein a tel dawn vangin nuai 25 a pai bawk. Tichuan, silver medal a awrh haw takah chuan sorkar laipuiin nuai 50 pein Manipur sorkar-in nuai  100 a pe dawn bawk a, Ministry of Railways (India) leh Northeast Frontier Railway chuan nuai 200 an pe dawn bawk a ni.