ZALEN October 29, 2024: Vawiin khan Mizo Inneih, Inthen leh Rokhawmna Dan ennawntu, Review Committee chu an Chairman Zamingthanga Ralte, Addl. Secretary, Law & Judicial Department hovin Secretary Conference Hall-ah a vawi khatna atan an thukhawm. He dan hi Kohhran ten inneihna an buatsaihin an hmang ngei tih tarlan a ngaih tur thu sawi a ni.

He Dan the Mizo Marriage, Divorce and Inheritance of Property Act, 2014 hi Law Commission kut chhuak niin Mizoram Assembly chuan kum 2014 khan a pass a, Ni 13.02.2015 atang khan hman tan a ni. Mizoram Sawrkar chuan he Review Committee hi 11.09.2024 khan a din a, an report hi kum khat chhunga thehlut tura tih a ni.

Chairman Zahmingthanga Ralte chuan Mizoram Kohhran hrang hrang ten inneihna an buatsaihin he Dan hi an an hmang ngei a ni tihlan nan Inneih Certificate-ah an tarlang ngei tur a ni, a ti a. He Dan tlawhchhan lova Inneih te chuan he Dan-in hamthatna hrang hrang a ken tel te chu an chang ve thei dawn lo a ni, a ti.

Chuvangin he Dan la hmang ve lo Kohhran an awm chuan hman vat a tul thu a sawi bawk. Hetih rual hian Kohhran hrang hrangin Inneih sawngbawl leh inkaihhruaina an neih te nekbuai lo zawnga he Dan hi siam a ni a, chu chu Sawrkar duhdan reng a ni, a ti bawk.

He thutkhawmah hian Mizoram Kohhran Hruaitu aiawh te, Central YMA, MHIP, MUP leh Women Commission aiawh te bakah mi thiam sawm bik engemawzat an tel.