&&&& FAK VE PHAWT MAI TEH A HO TLAT tih lehkhabu kan tihchhuah hlim khan ka hlim khawp mai a. Maawma of Samaritan Printer in a kawm leh a bu chhung inrem dan vel a siam nalh bakah a chhut (print) fel fai nalh thah maite chu hmuhnawm ka ti ve a. Ka thlek ka thlek lai chuan ka nau Pastor Aizawl rawn kal remchang chu a lo leng lut a. “Hei, ka lehkhabu chhuak thar a nih hi,” tiin ka pe a, bual inah ka luhsan ta a. Tha a tih ve ka ring a, ka inbual lai pawh chuan ka mitthlaah ka lehkhabu thar chu ka hmu a, inbual zawha ka nau nena sawi zui chu ka chak hle a.   Ka inbual zo chu, a bulah ka va thu hnai a. A ngawi ta tlat mai a. Lehkhabu chu dawhkanah a dah a. a rawn tawng chuan thil dang a sawi ta daih mai a. Ka’n nghak deuh a, ka lehkhabu lam reng reng chu a sawi ta hauh lo mai a. Ka hrilhhai ru ang reng viau mai! Ka rilru chaponain a beisei dan takah chuan lehkhabu chu a lo la keu nuap nuap ang a, “A va tha ve aw! A bu hmelhmang pawh a nalh a, a chhut a faih tha si, a thu pawh a va tha em! Hei zet chu lehkhabu tha a nih hi! Congrats” te a tih ka ring asin! Mahse engmah a sawi lo. Lehkhabu pawh a melh lo. Kei, mi fakna hriat chaka tuihal tlat mai chu ka ngawi thei ta pek lo a, “Lehkhabu chu tha i ti vak na nge?” ka’n ti ta pek a. “Ti e,” a ti mai a. “I en em ni, i va ngaihsan loh hmel ve!” ka’n ti lehpek a nih kha! (Aw, miin engahmah an ngai lo a ni mai alawm maw le aw!!) “Ka en chhuak vek, in nu bulah ka lo fak zo vek tawh a,” a ti ta a.   Ka nau khan ka lehkhabu chu a lo chhuang ru ve riau mai thei a, ka nupui bulah te, Champhai lamah te, mi bulahte pawh a lo fak ve viau mai thei e. Mahse kei, a ziaktu mi chapo, fakna ri ngaihnawm ti em em bulah hian, ka beng hriatah ngei, ka hmaichhanah, ka lawmna turin, ka phurna turin a fak lo kha ka ngei tlat!! (Whatsapp emoji hman theih se chu zawngte hmai hup leh mittui per chuaia nui lai dah telna tur chi!) Naupang pakhat hi a lo tlan haw a, lemziak intihsiaknaa pakhatna a nih thu phur zetin a rawn sawi a. A pa chu a ngawi reng a. Naupang chu a hrilh a hai khawp mai a. A pa chuan a chhuang lo niin a hria a, a thil tih leh a talent-te chu engahmah a ngaihsak lo niin a hria a, a lunghnur hle a. A lemziakna hmanruate chu paih darh vek mai a duh hial a. A pa chu a chhuak thurh a, thenawmah a va lut a, a fanuin lemziak pakhatna a nih thu chu chhuang takin a va sawi luam luam thung lawi si. A fanu chu a chhuang hle naa, a fanu rilru erawh hliamin a awm tho!   Han infak zauh hian mihring hi min tichak a, min tiphur a, hmalam pan turin min nawr fo. In hauh reng, inzilh reng, infuih reng, invenpui reng lutuk fahran hian mihring min tiphurin min tichak ber lo fo. Thu tam taka inzilh vak ai chuan a hun leh a hmun dik taka tawngkam khata infak zauh hian a tha zawngin min nawr kal fo zawk!   Infak hi kan hreh khawp a. Mi sawiselna lamah erawh kan lei leh kut zungpui hi a che rang viau thung. Tu emaw chhuanawmna te, tu emaw fakawmnate hian kan titi leh social media a luah tam lo. Mi fakawmte ‘like’ leh ‘comment’ taima si lo hian tu emaw demna lam thu erawhin sawi zuitu a ngah thei fu thin.   Inpawih fak hi in ral rel ai chuan a tha zawk! Hmai chhana infak hi a dawngtu tan chuan a nuam a nia! Kan hriat phak loh hla taka infakna hian min tiphur lem lo! Insiam thatna tur atana insawisel hi a tul chang a awm. Mahse fakna bawk hian a thawk na zawk fo a nia! Faktlak i hmuh chuan fak hreh suh. Fak ve phawt mai teh, fakna dawn hi a nuam a, a thawk tha bawk thin.