Aizawl: MLA Lalruatkima chuan nimin khan Aizawl Press Club-ah chanchinbumite kawmin Pathian leh mipui zara MNF-in sawrkar a siam huna an hmalakna tur a sawi. Lalruatkima chuan MNF-in an ngaih pawimawh tur a sawi zingah sawrkar inrelbawlna tha leh rintlak, langtlang leh mawhphurhna la ngam din an tum tih a sawi a. “Hawn tur a awma kan sawrkar chak tak thawh a nih hi ti zel si khan leichim, kawngchhia leh Gas harsatna nasa tak kan tawh laia hmaihupsana Official te leh Gas Agent te mawh alawm ti leh mai mai lo tur Transparency, Accountability leh Responsibility sawrkar kan siam dawn a. Eirukna chhuitu tur Lok Ayukta tihhlawhtlin thuai a ni dawn a ni,” a ti. Lalruatkima chuan MNF-in sawrkarna a siam chuan MLPC Act tihtawp an tum thu te, kum 9 chuang kawng chhia avanga harsatna Mizoramin a tawh siam that an tum thu te, thisen man sawrkarin a lak thin tihtawp an tum thu te, thuneihna semzai an tum thu te, Aizawl khawpui laili atanga Assam Rifle sawnchhuah an tum thu bakah nitin mamawh hnianghnara pek an tum thu sawiin, “Ration chini pawh sem leh kan tum a ni,” a ti bawk.