Aizawl March 22, 2024: Vawiin khan World Water Day 2024 lawmna chu Public Health Engineering Department (PHED) leh Central Young Mizo Association (CYMA) te tangkawp buatsaihin Vanapa Hall-ah neih a ni. Er. Lalhmingliani Hmar, Secretary, PHE Department chu khuallian niin he hun hi a hmanpui.

Kuminah hian thupui atan 'Inrem nan tui' (Water for Peace) tih chu thlan a ni a, khuallian Er. Lalhmingliani chuan tui chu mitin mamawh vek a nih angin, chakkhai atana hmanna chi hrang hrangah, khawvel changkang zelin mamawhna pawh a ti tam ve zel a, tui duhkhawp hman tur nei lo chho tan ve dawna a lan avang hian hmanna hrang hrangah innghirnghona awm thei lakah inhriatthiamna nen inrem taka awm tlan a ngai a ni tih a sawi.

Kumin World Water Day lawmnaah hian mi chi hrang hrang hnenah chawimawina leh intihsiakna buatsaih lawmman sem a ni a, tuihna humhalh kawnga mimal thawk tha mi 4 chawimawina hun neih niin, C. Lalngaihsaki, Thaizawl (Lunglei District) ; H. Lalramnghaka, Lamchhip (Aizawl District) ; R. Lallianzela, Kepran (Aizawl District) bakah Pachhunga, Thiak (Aizawl district) khuate chu chawimawina hun hlan a ni a, hei bakah hian Mizoram pum huapa WATSAN Committee thawk tha thlanchhuah nghal niin, Mizoram pumpuiah Mualthuam 'N' WATSAN Committee chu ti tha ber lawmman nihna pek niin, pahnihna atan Chhuanthar Tlangnuam WATSAN Committee thlan ni bawkin, pathumnaah Buarpui WATSAN Committee leh Vanchengte WATSAN Committee-te thlanchhuah an ni.

Vanapa Hall-a World Water Day lawmna hun hi Engineer-in-Chief, Er. F.Liantluanga chuan kaihruaiin, Central YMA atangin President, Lalhmachhuana chuan thu a sawi a ni. Thupui thlanchhuah, 'Inrem nan Tui' tih hmangin Er. Lalrothanga, Chief Engineer, PHED chuan thu a sawi bawk. Er. H. Duhkima, Director, PMU PHED chuan lawmthu sawinain he hun hi a khar a ni.