Covid 19 hrileng vangin hun rei tak infiamna khawvel a chawl a, Mizoram ngei pawhin hun harsa tawngin hun rei tak chhung infiamna hrang hrang kan chawl a, kum hnih chuang tournament lian tham a awm loh hnuah Mizoram Football Asssociation buatsaih, LBS Suzuki All Mizoram Inter Village Football Tournament chu June 24, 2022 hian khelh a ni leh dawn ta. He hunah hian MFA chuan Mizoram chhunga khua leh veng zawng zawng te tel turin a sawm a ni.

He tournamenta tel tur te chuan June 14 thleng entry fee pek theih a ni ang. He football tournament hi LBS Suzuki ten an sponsor dawn a ni. 

Vawiin May ni 31-a Organising Board thukhawm chuan tournament lo awm tur thlirin thil pawimawh tak tak an rel a, chung te chu:

Tournament tan hun: 
June 24, 2022 hian tournament hi khelh tan a ni dawn a, team tel tur zat azirin inkhelhna hmunhmate buatsaih a ni ang. He inelna hi knock out system-a khelh tur a ni dawn a, July thla chawhma lama zawh fel hman tum a ni a; MPL club-te leh DFA hnuaia club-te'n Independence Day Football leh tournament dang an khelh tura inbuatsaihna hun an neih theihna tura zawh fel tum a ni.

Entry Fee pek dan:
Tournament-a tel tur tan entry fee Rs 1,000 pek tur a ni a, hei hi June 14 hma ngeia pek fel tur a ni. Online (G-pay) hmanga pek tura ruahman a ni a, Organising Board Assistant Secretary Frank Rinpuia 9862647664 hnenah pek tur a ni ang a, June 14 tlai dar 3:00 hmaa pek fel tur a ni.

Dan leh hrai:
LBS Suzuki All Mizoram Inter Village Football Tournament dan leh hrai (rules & regulations) hi MFA Facebook Page (Mizoram Football Association) lamah download theiha dah a ni dawn a, hriat chian duh neite tan awlsam takin khawi hmun atang pawhin a hmuh theih dawn a ni.

MFA sawmna:
MFA chuan he inelnaah hian Mizoram chhung district hrang hranga veng leh khaw tinte tel turin a sawm a, player zawnna (scouting) hun tha a nih dawn avangin thingtlang khaw kilkhawr bera player tan pawh MPL leh ram pawn lam thlenga khelh theihna remchang inhawnna a ni tih hriain khaw tinte mahni thalaite tana hun siamsak turin a ngen. He inelna a hmuna en a, player zawng turin MPL club-te bakah ISL, I League leh football academy lama scout-te MFA chuan chah a tum bawk a ni. Hei vang hian champion beiseina nei phak chiah lo team kan lo awm a nih pawhin player phochhuahna (exposure) hun thaah MFA chuan chantir a tum a ni.