Veng/khua inelna neih hnuhnung ber tumin hmeichhe final-ah Diakkawn Village Council, Kolasib leh Thenzawl East VC an lo inhmachhawn tawh a, kuminah pawh final-ah bawk an inhmachhawn leh dawn.

Mizoram Volleyball Association (MVA)-in a buatsaih, JJS Trucking BharatBenz Inter Village Volleyball Tournament 2023 chu a hmawr bawk a ni dawn ta a, Ningani tlaia hmeichhe semifinal khelh zawhah tournament hnuhnung ber finalist pahnihten an tumpui ve ve hnehin nomawi an inchuh nawn leh dawn.

Kum hnih dana inelna buatsaih thin hi kum 2021 khan Covid-19 leng avangin huaihawt theih a ni lo va, a hnuhnung ber, kum 2019 khan hmeichhe final-ah Diakkawn VC hian 3-0-a Thenzawl East laka hnehna changin an champion a, kuminah an nomawi kawl humhimna remchang an nei mek.

R. Dengthuama Indoor Stadium, Mualpui, Aizawla kar hmasa Thawhlehni atanga inelna kalpui tan hi Zirtawpni zan hian zawh a ni dawn.

Ningania semifinal khelh hmasak zawkah champion lai, Diakkawn hian Serkawn VC, Lunglei chu 3-1 (21-25, 25-11, 25-20, 25-14)-a hnehin final an lut a ni.

Semifinal lehlamah Thenzawl East chuan Mizorama hmeichhe volleyball hmunpuia chhal ngam zinga mi, Kanan LC chu 3-2 (25-17, 12-25, 19-25, 28-16, 18-16)-a hnehin final an lut bawk.

Hmeichhe semifinal khelh zawhah hian mipa semifinal khelh zui nghal a ni a, Zirtawpniah vek final khelh a ni ang.