R. Dengthuama Indoor Stadium-a volleyball hmanga veng leh veng, khua leh khua inelna kalpui mekah mipa champion lai, Maubawk LC chu quarterfinal lut zo lovin an tla.

Thawhtannia quarterfinal luh inchuha inkhel dangah Pro Volleyball 2023-a Mizo player tha bera thlan, Vanlaltanchhana (Valbuanga) chuan an veng a chakpui zo lo bawk.

Kar kalta Thawhlehni atanga khelh tan, Mizoram Volleyball Association (MVA) buatsaih JJS Trucking BharatBenz Inter-Village Tournament 2023-ah an inthlifim zel a, tunah chuan hmeichhia leh mipaah quarterfinal lut pali ve ve a hriat tawh a, Thawhlehni hian a hriat kim ang.

Mipaah tournament hnuhnung bera champion, volleyball ngaina veng pakhat, Maubawk hian Ngopa VC lakah bul tan tha zawkin set hmasa ber la mah se an dingchang zui thei ta lo va, 3-2 (16-25, 25-19, 20-25, 25-20, 15-9)-a chak lovin a thiam pariat zingah an tel phak ta lo.

Hetih lai hian mi mala Mizo mipa player hriat hlawh bera chhal ngam ni mek, Valbuanga chuan Khawhai VC lakah Kawnpui VC II chu hnehna a chanpui zo lo.

Khawhai hian Mizoram volleyball-a inelna sang ber, Pro Volleyball player thiau hmangin bul an tan a. Kawnpui VC II hi Pro Volleyball-a Thutak Nunpuitu Team (TNT) champion-puitu, Valbuanga hovin an thawk chhuak ve thung a. Mi malin point tam tak thawk chhuak mah se a thianten an pui tha tawk lo va, 3-2 (25-20, 25-11, 19-25, 25-19)-in a tlawmpui.

Inkhel dangah Pro Volleyball player kawl nualtu, Chhinga Veng LC chuan Lungdai VC lakah 3-1 (25-16, 25-14, 20-25, 25-16)-a hnehna changin quarterfinal an lut a. TNT hmunpui leh an player kawl nualtu, Muanna Veng LC pawhin 3-0 (25-20, 25-23, 25-23)-a North Vanlaiphai VC hnehin a thiam pariat zingah an tel bawk.

Hmeichhe lamah pawh champion lai, Diakkawn VC, Kolasib chu khelh hmasaka an awl (bye) hnuah an inlan ve ta a, Ainawn Veng LC chu awlsam takin 3-0 (25-18, 25-15, 25-7)-a hnehin quarterfinal an lut.

Thawhlehnia quarterfinal luh inchuhin hmeichhia leh mipa team riat ve ve an inlan dawn a. Heng zingah hian Mizorama volleyball hmunpui pakhat, tournament hnuhnung ber finalist, Hunthar LC-in tun inelnaa khaw tê ber, in 30 chauh awmna, an khelh tawh china team hmuhnawm ber pawl ni si, Kawlhawk VC an hmachhawn turin ngaihven a hlawh hle.

Hmeichhiaah tournament hnuhnung ber finalist, Thenzawl East VC an inlan dawn bawk a, Vaivakawn LC an hneh chuan quarterfinal an lut thei dawn a. Hmeichhiaa team tha ni reng thin, Pro Volleyball player pawh kawltu, Kanan VC pawhin Lungmuat VC an hmachhawn bawk ang.

Mizoram kil hrang hrang atanga volleyball player fuankhawmnaah hian mipa team 80 inlanin hmeichhe team 27 inlan ve thung a. Zirtawpni zanah final khelh tura ruahman a ni.