Mizoram Volleyball Association (MVA)-in veng leh veng, khua leh khua inelna a buatsaih tawha tel an tam ber tum, JJS Trucking BharatBenz Inter-Village Tournament 2023 khelh mekah mipa team 30 chiah dam an awm ta a, Zirtawpni atang hian hmeichhia an inlan tan ve dawn ta bawk.

Inter village tournament hi Thawhtanni zana spike off a nih hnuah Thawhlehni atang khan R.Dengthuama Indoor Stadium, Mualpuiah mipain an khel tan nghal a, Ningani zan thlengin khelh 50 awm tawhah mipa team 80 inlan atangin team 50 an tla tawh a, team 30 chiah an dam tawh.

Mipaah hian champion lai, Maubawk LC chuan khelh hmasak ber an awl (bye) hnuah Nilaini khan Thingdawl VC chu 3-1 (25-20, 24-26, 25-20, 25-12)-in an hneh a, Ninganiah Tachhip VC lakah 3-0 (25-23, 25-16, 25-22)-in hnehna an chang leh bawk.

Tournament hnuhnung ber final-a tlawm, Mizorama volleyball hmunpui ber pakhat, Hunthar LC pawhin khelh hmasak ber an awl hnuah Ningani khan 3-0 (25-10, 25-14, 25-8)-in Thingsulthliah VC an hneh ve bawk.

Kumin inelnaa tel tur hian hmeichhe team 27 an inziak lut a, Zirtawpni chawhma dar 10:00 atangin an khel tan ve dawn a, inkhel panga a awm ang a, court pathum awm zinga Court No. 3-ah vek an khel ang.

Kum 2021-a Covid-19 leng avanga inelna buatsaih theih a nih loh avangin a hnuhnung ber, kum 2019-ah khan hmeichhiaah hian Kolasib Diakkawnin final-a 3-0-a Thenzawl East hnehin an champion.

Champion lai leh finalist hi khelh hmasak ber an awl ve ve hnuah Pool A-a awm, Kolasib Diakkawn hian Thawhtanniah a vawi khat nan Ainawn Veng LC leh Chhingchhip VC inkhela chak zawk hmachhawnin inelna bul an tan ang a. Thenzawl East hian Pool B-a Lengpui VC leh Vaivakawn LC inkhela chak zawk chu Thawhlehniah an hmachhawn ve bawk ang.

Inter village tournament hi karleh Nilainiah quarterfinal khelh tura ruahman niin Inrinni zanah final khelh tura duan a ni.

MVA hian khua leh khua, veng leh veng inelna kum tin a awm theih nan inter village tournament hi Central YMA-in a buatsaih loh kum apiangin, kum hnihna zelah a buatsaih thin a. Kumin hi tel an tam ber tum niin hmeichhia leh mipa team tel kawp thei veng/khua pawh 17 lai an awm.