Mizoram Volleyball Association (MVA) buatsaih JJS Trucking BharatBenz Inter-Village Tournament 2023-ah an inthlifim zel a, hmeichhia leh mipaah team 16 ve ve chiah dam an awm ta.

Mizoram kil hrang hrang atanga volleyball player fuankhawmna hian boruak pawh a nei lian tan mek a, Inrinnia inkhel chhimtu zingah pawh MLA hmel hmuh tur an awm ta a, an bial chhunga VC team an tawiawm.

Inter-Village tournament hi Thawhlehni zan khan R.Dengthuama Indoor Stadium, Mualpui, Aizawlah mipain khel tanin Zirtawpni atang khan hmeichhiain an khel tan ve bawk.

Inrinni tlai thleng khan mipa team 80 inlan zingah team 64 zet tla tawhin Thawhtanni atang hian quarterfinal luh inchuhin team 16 an inel chhunzawm dawn a. Hmeichhiaah pawh team 27 inlan zinga 11 tla tawhin a la dam 16-ten a thiam pariat zinga tel an inchuh zui ang.

Mipaah tournament hnuhnung bera final-a inhmachhawn pahnih, Maubawk LC leh Hunthar LC chuan vawi hnih ve ve khel tawhin a thiam 16 zingah an tel a. Thawhtanniah hian quarterfinal luh tumin champion lai, Maubawk hian Ngopa VC an hmachhawn ang a, Thawhlehniah Huntharin Kawlhawk VC an hmachhawn bawk ang.

Hmeichhe lamah erawh tournament hnuhnung ber finalist-te chu khelh hmasak ber awl (bye)-in an la inlan lo ve ve thung.

Champion lai, Kolasib Diakkawn VC chu Pool A-ah awmin Thawhtanniah a vawi khat nan Chhingchhip VC hnehtu, Ainawn Veng LC hmachhawnin inelna bul an tan dawn a. Runners-up Thenzawl East VC-in Pool B-ah Lengpui VC hnehtu, Vaivakawn LC chu Thawhlehniah an hmachhawn ve bawk ang.

Inter village tournament hi Thawhtanni leh Thawhlehnia a thiam team 16-te an inkhelh zawh leh hnuah Nilaini hian quarterfinal khelh tura ruahman a ni a, Inrinni zanah final khelh tura duan a ni.

MVA hian khua leh khua, veng leh veng inelna kum tin a awm theih nan inter village tournament hi Central YMA-in a buatsaih loh kum apiangin, kum hnihna zelah a buatsaih thin a. Kumin hi tel an tam ber tum niin hmeichhia leh mipa team tel kawp thei veng/khua pawh 17 lai an awm a ni.

Inelnain boruak a nei lian chho mek a, Inrinniah khan MLA pahnih chuan an biala team-te an tawiawm a. East Tuipui bialtu, Ramthanmawia chuan a bial chhunga VC pahnih, Farkawn leh Sazep inkhel enin Sazep hian 3-2-in hnehna an chang.

Hachhek bialtu Lalrindika Ralte pawhin a biala Zawlnuam Vengpui VC-in Kanghmun VC an hmachhawn chu a tawiawm bawk a. A bialte hian 3-0-in hnehna an chang nghe nghe.