DOWNLOAD OUR APP

Read latest news on your phone
play-store app-store
app-store
INTERNATIONAL OLYMPIC DAY - 23rd June, 2019
titi ZALEN
Jun 23, 2019
  • C.Laltlanthanga
    Secretary General
    Mizoram Olympic Association
    & Executive Member
    Indian Olympic Association
  • Kum BC 700 hma lam atang daih tawh khan, Greek-ho chuan Olympia khuaah “Infiamna Kutpui” hi an lo hmang tawh thin a, chu infiamna kal zel chu Olympic Games kan tih hi a ni ta a ni.
  • A tirah chuan an theihna leh chakna petu, an pathian hnen a lawmthu sawi nana an tih a ni a, An ram bung hran hran ‘state’ tin atangin an mi chak ber berte an rawn thawk chhuak thin a, game an hman kum hi chuan an innghirnghonate dah thain, hlimna kumah an hmang thin a ni.
  • A chak berte chu lawmman tinrenga vurin, an limte an din a, hlaah pawh an chawi thin a ni. A.D tir lam a, Rome sawrkar lo lian khan ‘Ringlo mite thil’ tiin game hman chu a khap tak avangin, hun rei tak, Olympic Game chu a thi ta rih a.
  • Amaherawhchu, kum 1800 laia upa Olympia khaw hluite laih chhuah a nih khan, Greek ho thu leh hla leh an Olympic lo ropuiziate chuan French Lal Upa min, Baron Pierre de Coubertin chu a hneh em em mai a, a hma laknain kum 1894-ah Modern Olympic to bul, International Olympic Committee (IOC) chu din a lo ni ta a ni. A tira Greek ho tih danin, ram ni lovin khua zelin a thleng thin a ni.
  • Kum 1896 atang khan Modern Olympic hi tan leh a ni ta a, kum 2016-a Brazil ram Rio de Janeiro Olympic kha a vawi 31-na a ni a, kum 4 dan zel a neih thin a ni a, nakum 2020 Olympic chu Tokyo-in a thleng dawn a ni.
  • Olympic-a tel thei tur chuan an ram theuhah Olympic Association an din tur a ni a, Indian Olympic Association pawh hi kum 1927 khan din a ni a, chumi hnuaiah chuan Mizoram Olympic Association (MOA) pawh kum 1984 khan din a ni ve a
  • Tun dinhmunah MOA hian game hrang hrang 17 (sawm pasarih) lai enkawl (recognised) a nei a, an hmasawn nan leh Olympic a an tel ve theih nan inkhelhna hmanruate leisakin, sum faite pawhin heng association-te hi a pui thin a ni. Tin, Mizote hi Olympic huangah kan mikhual lo khawp mai a, Burma ram aiawhin Vanlaldawla, 1972 Munich Olympics-ah Boxing a khel tawh a, Lalremsanga Chhangte-in Archery-ah tum 2 (Barcelona Olympics 1992 leh Atlanta Olympics 1994)-ah India tan a lo khel tawh bawk a. Tin, 2016 Rio Olympics-ah khan Women Hockey-ah H.Lalruatfeli chu India Team ah a tel ve bawk a ni. Kum 2018 Youth Olympics, Argentina-a neihah Jeremy Lalrinnunga’n Weightlifting-ah Gold Medal hlawh chhuakin Lalremsiami’n Women Hockey-ah Silver a hlawh chhuak ve bawk a ni.
  • Kum 1948 atang khan Olympic Day hi kum tin June 23-ah hman thin a ni ta a. Khawvel ram 200 chuang ah, a hmei a pa, upa leh naupangten sports uar chhoh a nih zel nan te, mi dang zah chunga mawi tak a khel tur te leh sportsmanship neih nan tea inzirtir nan he ni hi hman thin a ni a, a huhova tlante, sports exhibition te, seminar te leh musical concert te nen hial he ni hi hman a ni bawk thin.
  • Kum 1987 atang khan IOA chuan Olympic boruak siam nan leh a ram mipui nawlpui, sports lama kaih harh nan he niah hian Olympic Day Run, ‘A huhova tlan’ a huaihawt tan a. MOA pawh hian kan lo in-fit zawk nan te, insum theih nan te, sports boruak siam nante leh Olympic Movement atan te 2006 atang khan Olympic Day Run a lo buatsaih tawh thin a. Zingkarah Sikulpuikawn, Vaivakawn leh Chanmari atangte a a huhova tlanin Lammualah intawk khawmin function tawi te hman thin a ni a, a tlan tam ber discipline te chu lawmman pawh pek an ni thin a ni.
  • Awle, sports hi ram tan a mi hmantlak, mihring tling chher chhuahna a nih avangin ngaihthah chi a ni lo va. Kan thalai, infiam mitein chak taka hma an sawn nan leh Olympic-a an tel ve theih nan sorkar chuan theihtawp a chhuah zel a. Tumruhna rilru nen hma lam pan zel i tum ang u.

Latest News & Chhiar Hlawh