Vawiin thlengin feminism leh feminist theology (hmeichhiate an chanvo dik chantir tumna theology leh hemi kawnga hmalakna) kan la hre fiah hlei thei lo hi a vanduaithlak hle in ka hria.
Hmeichhiate rahbeh duhna rilru atang leh hmeichhiate tluk loh hlau reng reng (fragile and insecure masculinity) rilru a?ang chuan hlauh awm tak pawh a ni reng lah tak a. Mizote zingah kan hmeichhia te an sang tawh (zirna, sumdawnna, leh eizawnna hrim hrim ah te) tiin kan insawithaih luai luai chu a nih tak ber hi! Kan hmeichhiate an lo dingchang ve ta zel te, mipa khawngaihna dil ngai lova an lo nung ve thei ta te, mahni a ei hmu mai ni lova chhungkua hial an lo chawm thei tate hi kei chuan lawmna tur zawk a niin ka hria. Chutih laiin mipate kan lo inthlahdah a, kan theihna (potential) pawh hlen chhuak zo lo khawpa kan lo zawmthaw ta a nih erawh chuan a vanduaithlak viau thung ang a, ?an kan lak a ngai tihna a ni (mahse hmeichhia kan hnuaichhiah theihna tur atan ni lovin Pathian talent min pek kan hman chhuah theih nan zawk). Hmeichhia an san tak vanga mangan tur a ni lo va, nang/kei mipain Pathianin theihna min pek pawh hlen chhuak zo lova ka awm avanga mangang tur zawk kan ni ang. He lam thu hi chu heti chin hi ni teh se.
Feminism emaw feminist theology hian mipate rahbeh a hnuaichhiah hi a tum a ni lo va, hmeichhiate hmeichhia an nih avang ringawta rahbeh leh hnuaichhiah ngawih ngawiha awmte thlavang hausaka, an theihna (potential) hman chhuahtira, hmeichhia an nih avang ringawtin an hniam bik lova mipate ang thova zahawmna, ropuina, leh dikna tinreng nei an ni tih hi lantir a, chutiang intluktlanna khawvel chu din a tum a ni. Women’s flourishing (hmeichhiate an mawina leh theihna tinreng nena par chhuah tir) hi a tum a ni.
He ngaihdan leh theology (feminism) hian mipa sawngnawi (insecure), mipa chak lo, authoritarian mipa (dictator nih châk/nih duh mipa), power/thuneihna thlahlel te, a tawi zawngin fundamental consevative te zingah hlauh leh sawihnawm a hlawh hle zel tlangpui a tih theih awm e (vanduaithlak takin he ngaihdan leh pawm danin hna a thawh dan hi a rilin a inphum thuk a, a ngheh em bawk avangin hmeichhiate ngei pawh tam tak chu he ngaihdan hian a hmin zan thei tlat mai a ni!). Chungte chuan Pathian thu (ni a an hriat) hmang leh culture/society kalphungte hmanruaah hmangin hmeichhiate chu beng hniam a, feminism chu sawihnawm an tum ngar ngar ?hin. Chung mite chu hlauhna in a mana, hmeichhiate nena intluktlan kha rahbeh nihna ang tlukin an ngai a, a chhan chu dinhmun/chanvo ?ha an lo chan rei lutuk tawh avangin intluktlanna (equality) te kha thil dik lo (injustice) angin an hmu tlat tawh a, chuvangin fiamthu, diriamna ?awngkam, deuhsawhna, an finna, leh hmanraw tinreng hmangin an bei let ta ngar ngar ?hin a ni. Mahse an hun a liam mek, tuna thil inher danglam dan hi an thlak thei tawh bik lovang. A va ?ha em!
Nakin lawkah chuan hmeichhe pastor/minister kan la nei ve nual dawn a (hmeichhia an nih avang ngawta rawngbawlna ban phak loh an nei tawh lo anga, an tana khawih thiang lo rawngbawlna a awm tawh bik lovang; nghakhlel takin chu hun chu kan thlir a ni); hmeichhe Chief Minister/minister/MP te kan la nei bawk ang; thaibawih nih kan hlauh ang chiahin hmeichhia (leh kan mihringpui dangte) rapbettu nih kan la hreh anga, Mizo kohhranin pastor nupuite chungchanga kan rorelna te hi ?hangthar te chuan mak an la rawn ti dawn a ni…
CHU HUN CHU KAN THLIR A, THLIR MAI KAN DUH TAWK LOVA A THLEN THEIH NAN KAN BEI BAWK A NI!