Aizawl 18 December, 2023: Vawiin Thawhtanni hian ZPM chuan chhung inkhawm hun an hmang a, he huna thusawitu PWD Minister Vanlalhlana chuan, “Inthlan hma khan vawi 27 chu Corruption ka ti lo ang’ tih hi ka sawi hman a. Mipuiin kan chungah rinna an nghat ta a, sawrkarna ngelnghet tak siam turin ZPM a ding ta a. Opposition party-te pawh party feikibar pui puia kan inbeihna kha titawp tawhin sorkar tha leh chak tak nei tura tangho turin ka sawm nghal a ni. Kan opposition leader Lalchhandama Ralte khan constructive opposition nih a tum thu a sawi a. Tha takin kan kalho thei ngei ang tih ka ring a ni," a ti

Hlna chuan, “Ram rorelnaa Pathian ram din tih hi kan party thil tum hmasa ber a ni a. Secular rama Pathian ram din tih hi a harsatna sawi awm thin mah se Pathian ram din turin sorkar kalpui kan tum a ni. Kan CM hi Chawlhhmun Kohhranah Upa a ni a, kan Opposition Leader Lalchhandama Ralte hi Durtlang Leitan Kohhranah Upa a ni bawk a, INC lama kan MLA Ngunlianchunga pawh Kohhran Upa a ni a. Kan Speaker Lalthanzama pawh an kohhranah Upa a ni bawk a. Kan ram hruaitu lu pawimawh ber berte hi kohhranah pawh rawngbawltu pawimawh hlir an ni a. Chuvangin ram rorelnaah Pathian ram tundin kan tih hian kan thawhhona a that phawt chuan kan ti thei em em ang," a ti bawk.

PWD Minister chuan," Kan rama roreltu kan thlan hian kil thuma inchuh hi a thleng ngai lo khawp mai. Tun inthlanah pawh khan a boruakah chuan kil thuma inbei kan ang a, mahse inthlan a hnai tial tial a, thuang hnihin kan inbei tih a chiang tial tial a ni. Hun lo kal zel turah pawh kil thum hian kan inbeih a rinawm chuang lo. ZPM sorkar hi kan party mi an lawm ang chauhin mipui pawh an lawm a, an mi beiseina pawh a sang a, an mi beisei ang kan phak loh chuan kan ram chu kal ngaihna a vang tawh ngawt ang," a ti.

Politics khelh dan pawh a dang tawh tih sawiin, “Kan politics khelh dan pawh a dang hret hret a, thalaiten ram tana tha tur ram veina an rawn nei lian chho tial tial a. Insaswiselna ringawt hi an ngaisang tawh lo. Insawisel tamna hmun apiangah kan chak emaw tih turin kan awm. Sum hmatheha inthlan hmachhawn hian awmzia a nei thui tawh lo hle tih a chiang a ni. Bial tin deuh thawhah kan khingpuiten sum an chelek chung khan sum vanga chak an tlem hle a ni,” a ti bawk.