Tun tum kan inthlang chu a hmasa lam ang bawkin Mizoram pumah thil thleng duhawm lo leh boruak sosang tak a awm lem lo niin a lang a. Kan inthlan dan la hre ve lem lo hnam dang Observer lokal thenkhat phei chuan boruak muanawmzia leh state dang nena a inan lohzia te, India ram pum tan pawha entawntlak kan nihzia te hahipin an sawi a, social media lamah an tarlang nasa. Phai lam atanga lo kal media-te pawhin hei bawk hi an puangzar nual. India ram hmun dang ngaihtuah chuan inthlanna thianghlim, zalen leh felfai ber a ni hial ang.   Inthlan dawna politics boruak inlumlet leh party ho tanlak nasatzia te, inlawm luh leh MLA bânsan thawm te, indeusawhna mawi lo tak tak te, party leh mi mal inbeihna tawngkam feikibar pui puite erawh kha chu a Kristian lo lek lek thin. Mahse, inthlan dawn hnaiah hian politics hi a nu but thin ve hrim hrim a. A thawm na apiang hian mipui an hip ber lo a, tawngkam dengkhawng cheh thinte hian mipui an lêm lo zawk fo thin.   Inthlan dawn hnaia party lian rorel lai congress party chhungkua an buai kha inthlan tingaihnawmtu a ni. Mahse, chu aia ngaihnawm chho ta chu an vice president leh home minister ni bawkin a bânsan a, MLA dang pali an bân leh hnua an chauh phah viau kan rin em em laia buai miah lo leh nghet churh anga an lang thei kha a ni a. Eptu party lian, MNF boruak kang chho tial tial a; mahse, an invawrh san chhoh mek laiin kawng hrang hrangin congress lamin an chhaih buai a. An thangkam a per chho zel a. MNF lam an insawifiah chhen a ngaih phah a. A beitu tur zawk tur a inveng zawkah an tang tluan ta parh a nih kha. Strategy mumal tak nei zawk an hriat hle.   Political party-te hian inghahna thuthlung leh tum bulpui (Ideology) an nei vek a. Mipuiah an ideology leh an hmalakna tur (policy/manifesto) an zuar ang a, chumi hmang chuan mipuiin an buk mai tur ni awm tak a ni a. Mahse, kan rama party-te hi chuan an ideology hi an kalsan fo a, an policy leh an manifesto pawh an ngai pawimawh zui lo fo thin. Ram hruaitu atana mi tha leh itawm an neih loh a, an policy-in hralh a tlak tak tak vak loh phei chuan khingpuite beih hi kawng awm chhun a nih hmel. Chutianga inbeihna nasa tak mai chu tun inthlanah khan kan hmu a - Congress leh MNF leh ZPM te press conference koh apiang kha party dang an beihna leh an insawifiahna a nih zel kha.   Phai lam atanga media lam mi lokal thenkhat, Mizo min hre chiang vak lote kha chuan BJP thli a tleh ve lo kha mak an ti viau a. Pakhat phei kha chuan inthlan zawhah ministry siamna atan BJP MLA an pawimawh viau a ring deuh a. Mahse, Mizoramin inthlan kan neih tawh thlir letin inthlan zawha sorkar siam tuma inthlem kual vel a la ngai ngai lo a, party mal emaw, inthlan hma atanga thawkho party emaw ten sorkarna an la siam thei ziah - post poll aliance a la ngai ngai lo. Tun tum inthlanah pawh hian sorkarna siam thei khawpa MLA ngah party an awm leh tho a rinawm.   Mizorama kan inthlanah hian party tan bur nei lo, party leh mi mal duh zawng apiang vote mai thei - neutral kan tihte hi an pawimawh hle a. MLA thlang tlingtu an ni. A chhan chu eng party mah hian an mi leh sate vote ringawt an tlinpui zo ngai lo a. Neutral (Swing voter)-te vote hui tam apiang an tling thin a. Kum 2008 leh 2013 ang tho khan neutral vote luan khawmna bik party hi a awm leh ngeiin a rinawm a, chu party chu hneh takin an tling lo ang tih a sawi theih loh. Hetianga ngawi renga mipuiin vote rawn bik an nei thin hi party ruihchilh lo thahnem tak an awm tihna a ni thei ang.   Tun tum inthlanah hian ZPM boruak a lian viau a, kum 2013-a ZNP ang tho khan neutral tam takin an tuipui a, inthlan pawh an phur phah. Congress ni lo MNF ni lo duh pawl hi an tam hret hret zel tihna a ni thei ang a, heng party lian pahnihte hi an inenlet a ngai hle tihna a ni bawk ang. Mahse, ZPM tan hian bial hima chhal ngam a vang viau. Mahse, a ruka an thli a kal fuh hlauh erawh chuan tlem azawng chu an tling thei tho. Bial tin leh khaw tin, veng tinah mi leh sa nghet an nei tam lo a, an hming ang deuh hian ‘movement’ a innghat an ni a, an candidate-te pawh neutral (leh swing voter) rin chhana ding an ni hlawm. Chuvangin, ZPM candidate tling tur chuan an dinna bialah, a lo berah neutral 90% vel talin an hui a ngai ang. MNF hi party lian, khaw tina inbun nghet tawh an ni a, congress party nen hian mi leh sa nghet an neih hi a inzat vel mai thei. Tunhma atangin (state nih hnu atangin) inthlan apiang hian vote hui tam ber an ni ve ve zel a. Mahse, neutral/swing voter-ten an hnawl zawk an tla a, an bawh zawk an tling mai zel. Tun tumah pawh hian kum sawm rorel tawh party hian zu zawrh te, kawng chhia te, ramri chungchang te, Chakma/Tuikuk chungchang te hi an tlakpui maithei. Mipui phun nasatzia ngaihtuah chuan congress hi an sorkar leh thei a nih chuan MNF hi an nep hle tihna a ni ang a, congress an ropui hle tihna a ni thung ang.   Party thli tleh chungchang hi sawi a ni fo a. Mahse, kum 2003 atang khan inthlan dawn hnaihah chutianga langsar taka party thli tleh kan hre lo a. Inthlan result-ah erawh chuan a ruka tleh a awm tih a chiang thung. Tun tumah hian ZPM boruak a kang viau mai a, an thli a tleh ti pawh an awm. Mahse, MNF thli pawh a tleh tih loh rual a ni lo. Congress vice president meuhin MNF a zawm a, MLA dang leh an hruaitu zingah ziaka bânna theh luta MNF zawm ta an awm nual a nih kha. Ram pum huapa an thli tleh tih tarlangtu pakhat chu inthlan dawn hnaia MNF VC thar 50 chuang a piang kha a ni. Mahse, November thla tir atang khan an boruak vung chho lai a tawp thut a, inthlan ni thlengin a hma angin an invawrh kang zo tawh lo a nih kha. Sawi tawh angin mipui rilru put hmang (voting behaviour) hi hriatthiam a har hle a. Ngawi reng hian sorkar lai hi an vote rawn leh a nih chuan sorkarna khawp MLA an nei pha hial thei bawk. Engpawhnise, ram pum huapin MNF hi sorkar siam tur khawpa MLA nei thei ber dinhmunah an ding ber chuan a lang. Kum 2008 leh 2013-a Congress ang deuh khan a ruka an thli a tleh a nih phei chuan MLA 25 chuang daih pawh an nei mai thei.