Aizawl: November 28, 2018-a Mizoram MLA inthlanpuia vote tlate chu naktip Thawhlehni zing dar 8 hian Mizoram district khawpui hrang hrangah chhiar tan a ni dawn a, result hi chawhnu lamah chuan hriat theih beisei a ni.   Aizawl bikah chuan tum danga hmun khat chauha vote chhiar thin chu tun tumah hian centre 7-ah chhiar a ni dawn a, centre khatah hian Assembly constituency 2 zel dah a nih dawn avangin chhiar zawh thuai beisei a ni.   Champhai district-ah hian Assembly bial 5- Lengteng, Tuichang, Champhai North, Champhai South leh East Tuipui te awmin DC complex-ah chhiar a ni ang a. Serchhip district-ah bial 3 - Serchhip, Tuikum leh Hrangturzo te awmin DC office complex-ah chhiar a ni ang a, Lunglei district-ah bial 7- South Tuipui, Lunglei North, South, East, West, Thorang leh West Tuipui awmin Saikuti Hall-ah te chhiar a ni ang. Lawngtlai district-ah bial 3- Tuichawng, Lawngtlai West leh Lawngtlai East te awmin Lawngtlai College ah chhiar a ni dawn a, Siaha district-ah hian bial 2 Siaha leh Palak te awmin Govt. Siaha College-ah chhiar a ni ang. Mamit district-ah hian bial 3- Hachhek, Dampa leh Mamit te awmin DC office complex-ah chhiar a ni ang a, Kolasib district-ah hian bial 3- Tuirial, Kolasib leh Serlui bial te awmin Govt. Kolasib College-ah chhiar a ni ang.   Counting centre tinah hian vote chhiarna tur dawhkan eng emaw zat dah zel a ni a, eng emaw rokhawlhna a awm a nih loh chuan chawhnu dar 1 velah chuan result hriat kim hman beisei a ni.   Election Commission of India-in ruahmanna a siam dan chuan inthlan kaihhnawih hi December 13, 2018-ah chuan zawh vek tawh tur a ni a. Tuna Ministry dinglai term hi December 15, 2018-ah a tawp dawn a ni. Aizawl district huam chhunga Assembly bial 14-te vote chhiarna hmun tur: 1. Pachhunga University College Tuivawl Chalfilh Tawi Aizawl North I Aizawl West I Aizawl South I 2. R.Dengthuama Multipurpose Hall Aizawl North II Aizawl North III 3. Assembly Annexe Aizawl West II Aizawl West III 4. Govt. Aizawl College Aizawl South II Aizawl South III 5. Govt. Hrangbana College Aizawl East I Aizawl East II