Aizawl: November ni 28,2018 (Nilaini) a Mizoram MLA inthlan loawm turah ruahmanna engkim peih a ni a. Tripura a awm mek Bru te vote thlakna tura tih Kanhmun khuaah chuan Bru ten vote thlak an tum tih an sawi. Zalen palaiin Election thawktute hnen atanga thu a dawn danin inthlanna atan hian ruahmanna engkim peih a ni tawh a, inthlanna a duty tur polling party thenkhat chuan naktuk Thawhtanni hian a duty-na hmun tur an pan dawn a, hmun hnaia duty turten Thawhlehni ah an duty na hmun tur an pan thung ang. Inthlan hi zing dar 7 atanga tlai dar 4 thleng neih a ni dawn a, vote thlak zawh veleh EVM te hi a dahna tur strong room panpui nghal zel a ni ang. Vote tla te hi December ni 11,2018 Thawhlehni ah chhiar a ni dawn a, district khawpui hrang hrangah chhiar tur a niin Aizawl ah chuan hmun 5- Assembly Annexe, Hrangbana College, Govt. Aizawl College, Pachhunga University College leh R.Dengthuama hall ah te chhiar a ni ang. MLA inthlan lo awm turah vote thlak an tum leh tumloh chungchang Zalen zawhna chhangin Mizoram Bru Displaced Peoples Forum (MBDPF) hruaitu A.Sawibunga chuan Election Commission in an tana vote thlakna tura a ruahman Kanhmun ah vote thlak an tum tih a sawi a. Kalna vel chu sawrkarin a ruahman dawn niin a sawi bawk. Tripura camp-ah party campaign an awm leh awm loh zawhna chhangin A.Sawibunga chuan, “Mizoram NGO te thu awihin Mizoram atang chuan eng party mah an lokal lo a, mahse Tripura a awm BJP te erawh an lo kal a, an chance an tha deuh mai thei a ni,” a ti.