8.4.2022; Tunhnai thla chanve chhung velin Mizoram a political party lian zual MNF, Congress leh ZPM hruaitute chuan Mizoram hmun hrang hrangah mithar an lawmlut a, party ten press released an siama alan danin, congress chu mithar lawmlut tam ber an ni.

Congress party-in Mizoram chhim lam fang a, 'Chhim Hrut Fehchhuah' hun an hmanah March 23, 2022 khan Bungtlang South-ah Lawngtlai West Constituency atangin mi 3,233 te chu MPCC president Lalsawta'n a lawmlut niin an thuchhuah ah an tarlang a, heng bakah hian Mamit tlangdung an fanna a an lawmluhte nen tunhnai a congress in mithar an lawmluh zawng zawng chu mi 3,705 an tling.

An party thuchhuah hrang hranga a lan danin, rorellai MNF party pawhin tunhnai a mithar an lawmluh zawng zawngte chu 2,081 an tling a, an president leh CM ni bawk Zoramthanga chuan March 30, 2022 khan Licheng Mual, Tlabungah mi 1,210 lawmlutin, hei hi tunhnai a mithar an lawmluh tam ber a ni. March 31 khan Lungleiah mithar 273 lawmlut bawkin, April 5 khan Serlui bial ah mithar 598 a lawmlut.

ZPM leader Lalduhoma pawhin tunhnai March 29 atang khan Chalfilh Constituency a fang a, an party zawm thar mi 496 leh April 6 zan khan mi 418 leh April ni 8 zan khan Lengteng bial chhungah mi 591 an lawmlut niin an party thuchhuah ah an tarlang.

Rorellai MNF in 2018 inthlan dawn a an au hla ber 'SEDP' chu an au hla a la ni chhunzawm zel a, Congress lamin 'That loh theih lohna Bawm' an sawi uar a, ZPM lamin, 'Kalphung thar, mipui sawrkar' tih lam hawi an sawi uar chho mek zel bawk.

(Heta tarlan bak pawh hi mithar lawmluh dang party tin in an nei a, tarlan chin te hi a hlawm lian zual party press released a an tarlan atang lak a ni.)