Aizawl; Health Services Deptt. hnuaia Drugs Administration Wing DAW atanga thu kan dawn danin, mipuite chu cosmetics hman kawngah fimkhur tur leh, a bikin 'ngona' atana tha nia sawi larte chu a him leh him loh ngaihtuah hmasa lova hmang mai lo turin hriattir an ni. Tunlai hian cosmetics hrang hrang hman an intihhmuh hle a, a bikin thalai ten 'ngona' nana cosmetics hman an uar hle tih DAW thuchhuah chuan a tarlang a. Centre for Science and Environment (CSE), New Delhi in hemi chungchang zir bing tur mithiam a ruat ten, Pollution Monitoring Laboratory, New Delhi-ah company hrang hrang siam cosmetics - Fairness Cream, Anti-ageing Cream, Lipstick leh Lip Balm-te an zirchiannaah chuan, cosmetics tam takah mihring taksaa tawrhna thlen thei heavey metals- lead, mercury, cadmium, chromium leh nikel te chu a him chin piah lam an tel niin a sawi. "Heng heavy metals te hian mihring taksaah vun natna hrang hrang bakah thawkna dawt, chuap, kal, pumpui leh rilah te nghawng tha lo neiin, cancer an thlen thei hial a ni," DAW atanga thudawn chuan a ti bawk. Hetih lai hian, Mizoram Food & Drugs Control Programme hnuaia Drugs Controller te chuan, kum 2013-2014 chhungin Aizawl khawpui chhungah damdawi dawr hrang hrang, dan loa damdawi hralhchhuak dawr 33 te license an tihtawpsak tawn nia hriat a ni bawk. Kum 2013 - 2014 chhung hian dan loa damdawi hralhchhuak leh dan zawm tha lo damdawi dawr 33 tihtawpsak bakah hian, dawr 76 zet chu 'show cause notice' pek an ni tawh bawk a, dawr 6 te chu court thubuai siamsak an ni tawh bawk a ni.