ZALEN, February 05, 2026: Indian Weightlifting Federation (IWLF) Youth, Junior leh Senior National Weightlifting Championships neih mekah Isak Malsawmtluanga chuan Ningani khan kg 239-a rit chawiin junior-a kg 60 huangah bronze medal a la a. Jeremy Lalrinnunga pawh he inelnaah hian a inlan dawn bawk.

Modinagar, Uttar Pradesh-a inelna neih mekah hian National Centre of Excellence (NCOE), Imphal, Manipur-a awm mek, Isak-a hian snatch-ah kg 104 leh clean & jerk-ah kg 135, a vaiin kg 239 a chawi a. Kg 253 chawi thei, Chera Tania, Arunchal Pradesh leh kg 247 chawi, Bunny Singh, Assam a tluk phak ta lo a ni.

Thawhlehni atanga championship tan hi karleh Inrinni thleng awh tur a ni a, Mizoram mai ni lo, ram pum huapa rit chawi chak hriat hlawh, Jeremy Lalrinnunga pawh hun eng emaw chen inhliam vanga inelna tak taka ainlan theih loh hnuah a inlan ve leh thei tawh dawn a, senior kg 65 huangah Inrinni hian a chawi dawn a, beiseina pawh a sang hle.

Championship-a inlan Mizo rit chawi chakte hi Vanlalchhanhima Parte, Khelo India (KIC) coach, Champhai Ruantlangin a hruai a ni.