Israel leh Palestinian-te inbeihna kal  mek zela remna sawipui dan dap turin nimin khan US palai chuan Tel Aviv a thleng.

Hady Amr hi Israeli, Palestinian leh UN mi pawimawhte inbiaknaah tel dawn a. US palai hian inbengdaih chu a tul tak zet tih a sawi.

Israeli thlawhnaten Gaza Strip an kah zui zelnaah nimin khan mi 10 an thih belh leh a. Hetih lai hian Palestinian helho pawhin Israel lamah rocket an kap lut reng bawk.

Kar liam taa Gaza leh Israel inkara inkahna thleng hi kum 2014 hnu lama an inbeihna lian ber a tling tawh.

Indona a chhuah atangin Gaza leh West Bank-ah mi 150 vel an thi tawh a, Israel-ah mi pariat an thi tawh bawk.

Palestinian thi tam ber hi Gaza-a mite an ni a; mahse, Zirtawpni atang khan buaina hi West Bank-ah kai tanin Palestinian 11 an thi a, za chuangin hliam an tuar.

West Bank-ah hian Israeli sipaite chuan Palestinian lungawi lote hnawh darh nan mittuio tlakna, thelret silaimu leh silaimu pangngai an hmang a. Lehlam hian petrol bomb-in an vawm ve thung.

Nimin khan Palestinian-te ni pawimawh, al-Nakba an tih a ni a. He ni hi kum 1948-a Israel a indan atanga Arab-Israeli indo chhuak avanga Israel-in an ram atanga Palestinian awmte an hnawh chhuah ni champha a ni.

Remna zawnga US-in Amr-a  a tirh luh mek laihian buaina chhuak mek chungchangah hian vawiin hian UN Security Council an thukhawm dawn bawk a. Israel-a US embassy chuan tuna an palai tirhin a tum ber chu lehlam lehlam inbengdai tura tih chu a ni tih an sawi.

United States President Joe Biden-a sorkar hian Israel-a hian palai (ambassador) nghet nei rih lo mah se buaina chhuah phah atang khan a ngaihven hle a ni.

A mi tirh, Amr-a hi nihna pawimawh tak nei si lovin tun hma lama US sorkarte pawh khan palai hna thawk tura an tirh chhuah fo a ni.

Bill Clinton-a hun laia Israel-a US ambassador Martin Indyk chuan indona a reh chu a beisei hnai nghal tak zet tih a sawi.

Hetih lai hian Palestinian politician hlun, Hanan Ashrawi chuan Amr-a inrawlh hian indona tihtawp leh tawp lohvah nghawng a neih phak a ring lo ve thung a. Israeli-ten a thusawi an ngaihthlak a ring lem lo tih BBC hnenah a sawi.