Khawvela mi ropuite chanchin ziahna lehkhabu (Biography)-ah hian an thih dan hian hmun 1/10 emaw chauh a awh thin a. Nazareth Isua, zirna lamah Degree pakhat mah nei lo, khawtlang rawngbawlnaah pawh V.C Member takngial pawh ni ngai lo chanchin ziaktu Matthaia te, Marka te, Luka te leh Johana te chuan a thih dan hi sei takin an ziak a. An palia ziah belhkhawm hi chang 599 zet a nia. A thawhleh thu an ziak belhkhawm pawh chang 146 zet a ni. Anniho bakah Paula pawhin Isua thihna leh thawhlehna hi a ngai pawimawh hle a. “Krista kha kaihthawhin a awm loh chuan kan thuhril hi engmah lo (dawt) a ni ang a, in rin pawh dawt a ni ang” (I Kor 15:14) tiin Korinth Kohhran a hrilh a. Mizo Kristian Hla Bu ka han keu va. Isua thawhlehna hla hi 6 (No. 226 - 232) chauh kan lo nei a. Hemi zinga 3 phei hi chu Kohhran tam tak chuan a sak pawh kan sa thiam lo a ni awm e. Kristian Hla Bu No. 551-ah hian A.D 324-a Kohhran hmasaten Kohhran Thurin an puanchhuah (Nicene Creed) an tih chu telh a ni a. Chang 6 leh chang 11 ah chuan, “Mitthi khuaah a zuk kal a, ni thum niah a tho leh a...Taksa thawhlehna ka ring a, chatuana nunna nen” tiin dah a ni. Necene Creed hi tu Kohhran mahin kan sa ngai lova kan chham rual ngai bawk hek lo. Kohhran Member zingah en lova Nicene Creed sawi chhuak thei kan tlem hle awm e. Mahni Thurin vawng bel lo tan ringtu tha nih a harsa duh awm mange! Thihna hi tuman kan sawm ngai lo va, tumah kan hnar thei hek lo. Ernest Hemingway-a chuan lehkhabu hmingthang tak “For whom the bell tolls?” tih a ziak a. “It tolls for you” tiin a chhanna a ziak nghal a.Isua chuan a dam laiin misualte kutah mantirin a awm anga, a thi anga, ni thum niah a tho leh ang tih a zirtirte vawi duailo a hrilh a. Mahse Petera te ho chuan an hrethiam thei tlat lo. Mihring hian mahni duhzawng leh ngaihthlak duhzawng lo chu kan ngaithla peih lo va. Isuan a thih tur leh a thawhleh tur thu a zirtirte chiang takin a hrilh a. Mahse Petera chuan, “Lalpa, Pathianin khawngaih che rawh se; chung chu i chungah a thleng tawp lo vang” a ti a. Isua chuan, “Setan, ka hnungah kal rawh; ka tan tlukna i ni e. Pathian duh dana ngaihtuah lovin mahni duh danin i ngaihtuah a ni” tiin a zilhhau a (Matt 16:22). Mahni ngaihdan, mahni duhzawng leh lo tih than dan (Tradition) ringawt chawivawngtute hi Kohhran tan leh pawl tan pawh “Thanmawhbawk” an ni thei a ni. Isua hi a tho leh a, a thlan pawh a ruak a ni tih hmu hmasatu chu Mari Magdalini a ni a. Mahse, a thusawi hi Petera ten an awih tlat lo. An mawh lo ve. Judaten hmeichhia an dah hniam em em a. Court-a thubuai sawinaah pawh thuhretu atan an hmang duh ngai lo. Mari Magdalini, K.S piangthar thusawi hi tunge maw awih ang le! Isua tho leh hmu hmasatute zingah a nu Mari hming a lang lo hi thil mak tak a ni. Isua nu hian thlan ruak hi hmu hmasa ber awm tak a ni a, Isua pawh hi a nu hnenah hian inlar hmasaber awm tak a ni. Mahse, “Ka rilru leh in rilru chu a inang lo va, ka awm dan leh in awmdan pawh a inmil bawk hek lo” titu Pathian chuan mihring ngaihtuah danin ro a rel lo tih hetah hian kan hre thei a ni. Isua thawhlehna chungchangah Petera a langsar hle a. Mari Magdalini, Jakoba nu Mari leh Salomite Isua thlanah an kal a. Tlangval pakhat puanvar sin an va hmu a. Chu tlangval chuan, “Kal ula, zirtirte leh Petera hnenah chuan Galili ramah in hmaah a kal dawna in hnena a sawi ang ngei khan chutah chuan in hmu ang tiin hrilh rawh u” a ti a. Zirtirte zingah hian Petera hi a tel si a, engati nge “Zirtirte leh Petera” tih a nih kher? Sermon tham a awm. Paula pawhin, “Krista chu Pathian Lehkha Thu ang zela kan sualte avanga a thih a, an phum a, Pathian Lehkha Thu ang zela ni thum nia kaihthawha a awm a, Kipha (Petera) hnena a inlar tekha,” a lo ti ve bawk a ni. ( I Kor 15:3 f) Isua thlan atanga a thawh leh ni tlaiah zirtirte chu Judate hlauvin pindanah an in khung khawm a, kawng an inkalhhnan a. An hnenah Isua a lo lang hlawl mai a. “In chungah thlamuanna awm rawh se” a ti a. “Pain kei mi tir angin nangni pawh ka tirh cheu hi,” tiin mawhphurhna a pe nghal a (John 20:21). Ni 8 hnuah zirtirte hnenah hian a inlar leh a. A inlar hmasak tum a awm velo Thoma pawh hemi tumah hi chuan a awm ve tawh a. Isua chuan Thoma chu, “I kut zungin han khawih la, ka kutte hi en rawh; i kut han ban la, ka nakah zen rawh; ring lovin awm suh la, ring rawh,” a ti a.(John 20:26ff). Heti chung hian zirtirte chuan Isua hi a tho leh tak tak a ni tih an la ring thei chuang lo. Petera chuan, “Sangha manin ka kal dawn,” a ti a. Zirtir 6 dangte pawh chuan, “Keini pawh i hnenah kan kal ve ang,” an ti nghal mai a (John 21:3). Hmanni lawka an lente kalsana Isua zuitute khan Galili Dilah len an deng leh ta a nih chu! “Mihring mantuah ka siam ang che” titu aw kha an hre phak ta lo a ni ang e! Pu Sainghinga (L) khan, “Chama, Mizoramah hian Thinker kan mamawh a ni,” a ti a. Pathian thu pawh hi chik taka zir peih kan tlem awm mange aw..! ka ti thin. Chanchintha 4 - te hi han chhiar ila, Isua thlan ruak hmutute leh thlana an kal hun an sawite hi a inkalh nuaih a, phuah rem theih a ni ang em?.Mita hmuh theih loh, kuta khawih theih loh, rilrua hriatthiam phak loh Incarnation (Pathian Mihringa a channa) te, Virgin Birth (Mipa tel loa nau piang) te leh Resurrection ( Mitthi thawhlehna) te hi sapin “Mystery” an tih hi a ni a. Mihring rilruin a hrethiam tak tak ngai dawn lo a nih hi tia ka ngaihtuah laiin Isuan Thoma hnenah, “Hmu lova ringtute chu an eng a thawl e” a tih kha ka hre chhuak a. Paula’n, “Hmutheia kal lovin rinnain kan kal zawk a ni” (II Kor 5:7) a tih leh Hebrai lehkhathawn ziaktuin Abrahama leh rinna pasaltha dangte chu rinnain an kal thin a tihte ka ngaihtuah chhuak a. Hebrai bung 11 ka han chhiar a, “Rinnain” tih hi vawi 18 zet a lo awm a. Hmuh theih loh ring tura rilru ka siam laiin, “Chung zawng zawng chuan rinna avanga fak lo hlawh tawhin thil tiam chu an chang lo va” (Hebrai 11:39) tih hi ka han chhiar a. “Uai, thil beisei hmulo tura han rin chu a va harsa duh awm ve!” ka ti a. Mahse, Isuan Thoma hnena, “Ring lovin awm suh la ring mai rawh. Hmulova ringtute chu an eng a thawl e” a tih kha ka hre chhuak a. Hriatthiam hmasak vek hnua rin ka lo tum thin chu hrethiam tura rin tur a lo ni zawk tih ka hre chhuak a. Anselm-a pawhin, “I believe in order that I may understand” a lo ti ve reng a ni. WCC-a Faith and Order Executive Secretary Pastor Deebandhu Manchala chuan, “Thlan ruak vangin tho leh Lalpa hi ring kan ni lo, amah nena intawhna (Personal encounter) kan neih avanga ring kan ni” a ti a. Paula pawhin, “Chanchin Tha ka hril hi mihring laka chhuak a ni lo. Tu hnen atang maha dawng ka ni lova, tuman min zirtir hek lo; Isua Krista ngei chuan ka hnenah a puang (Reveal) a ni” a lo ti daih tawh bawk ( Gal 1:11ff). Isua nena intawhna nei lo, Thinlung thar nei lo, rilru phurna (Emotion) avanga inhlan piangtharte hi Kohhran tithuanawptu leh tihmelhemtu an ni. Thlarau Thianghlima harhna a lo thlen theih nan tho leh Krista nena intawhna nei lote hi,”An piangthar loh ngam” a tul a. Inngaitlawma a bul atanga an tan that leh a tul a ni. Tichuan, Easter Sunday tak tak kan hmang thei ang a, “Christos Anesti - Krista chu a tho leh ta” tiin Pathian kan fak thei tawh ang. - K.L.Rochama