Central atanga Health Department rawn endiktute chuan Mizoram chu hriselna lama inenkawlnaah a tha thawkhata, hnathawkte pawh an awmna hmun turah an awm tha a, chutih rualin Damdawi In leh Public Health Centre (PHC) thenkhatah bungrua leh hmanrua te chu hman tangkai a nih loh thu an sawi a. Hei hi ‘internet’ a that tawk loh vang niin an sawi a ni. He harsatna hi Health Department chauh ni lo a ram pum huapa kan hmachhawn mek a ni a, a bul pui ber chu ram ruhrel (infrastructure) a that tawk rih loh vang a ni. Kan ram awmna a pilrila kawng tam takah hma kan sawn loh phah fo thin tih hi chu mi a nilenglo tan chuan hai rual a ni lo a. Ram leilung leh kan awmnain a zir loh avanga hetiang dinhmuna awm ni mah ila chhuanlama hmatheh erawh a tha ber chuang lo. ICT Department chuan State Wide Area Network (SWAN) hmangin Mizoram chu hmun khatah a thlung khawm a, thil tha tak ni mahse ‘connectivity’ a that loh chuan awmzia a nei chuang lo. Tunah hian ‘fibre optic’ hmangin India ram pum thlun chhuah tum a ni a, chumi hnuah thingtlang thlunzawm tur a ni leh a, hemi a hlawhtlin hunah chuan hma kan sawn a beisei awm. Tuna kan dinhmun ang hi chuan IT tangkaina kan la phawk chhuak pha lo hle. Hmasawnna hmu tur chuan a hmasa berin ramruhrel (infrastructure) tha neih a ngai a, hemi tel lo chuan hmalam zawnga ke pen a theih loh tluk a ni. Ram ruhrel a that chuan mipui hawiher pawh danglamin rilru sukthlek thlengin a nghawng thin a, chu chuan hmasawnna a keng tel hrim hrim zawk a ni. Tunlai khawvel ah chuan ‘internet connectivity’ a that loh chuan hnathawh a theih tawh lo a, hemi tel lo chuan khawvel hi a ding tawp tawh a ni. Kan ram pawhin hemi kailawn hi a zawh mek a, ‘connectivity’ a chhiat zual phei chuan mi tam tak eizawnna a buai nghal mai a, ‘service industry’ nasa takin a tibuai a, nitin mamawh zinga mi chanchin bu te pawh tih chhuah loh lek lek tum te a awm ve thin. Sum engzah tak luang ral tawh ang maw? Information Technology ah hian Sawrkar pawh thui tak a innghat tawh a, ‘connectivity’ a chhiat chuan sawrkar pawhin a tuar zel a, sawrkar sum hloh a awm phah fo a rinawm a ni. Tun -ai hian chak sela mimal sumdawnna a thang duang anga, hna tam zawk a pian phah bawk ang. Tuna kan neih ang hi chu hnathawhna atan a la tlak tak tak lo a ni. Thalaite’n hmun dang belhchianna (exposure) an tlachhama, thahnem ngaih kawngah hmun dang kan phak loh phahin kan inhre thin. ‘Exposure’ awlsam leh tha ber chu IT kaltlang hian a ni a, IT hian mi a ti changkang satliah mai lo a kan vela thil thleng thar leh thleng leh zel tur chenin min hriattir thei a, chu chuan nun leh khawvel hriatthiamna thuk zawk a pe a, hna leh eizawnna lamah pawh beng a tivar a ni. Mizoram-ah chuan BSNL hi kan rinpui ber a ni a, hmalakna kal mek hian hun a duh dawn bawk si a, hei aia a ziaawm theihna turin kawng a dap theih a rinawm a, a buaipuitute pawh kar deuh an ngai a ni mahna. IT ‘infrastructure’ tih changtlun hrim hrim hi chu engtik lai pawha ngaih pawimawh hmasak reng a ni tur a ni.